2 мин

Хэтэрхий гунигтай үед биед мэдрэгдэж эхэлдэг 6 өөрчлөлт

О.Анхзаяа 2022.08.18 3

2

Хэрэв танд эдгээр мэдрэмжүүд төрж, гуниглахад ихээхэн ажиглагдаж байвал амьдралын зөв хэв маягтай байхыг хичээж, мэргэжлийн хүнд хандан зөвлөгөө авч, өөрийгөө олон талаас нь өөрчлөхийг хичээгээрэй.

1. Цээж хөндүүрлэх

Цээж хэсэгт хөндүүрлэх, эмзэг болж эхлэх, зүрх хатган өвдөх зэрэг мэдрэмжүүд төрөх үеүд бий. Сэтгэл санааны байдлаас шалтгаалан биед хүртэл хөндүүр мэдрэгдэх мөчүүд үнэхээр хэцүү. Ийм байдалд хүрвэл мэргэжлийн эмчээс зөвлөгөө авахад буруудахгүй.

2. Ядарч сульдах

Юу ч хийх эрч хүчгүй, чадалгүй, хүсэлгүй болсон мэт санагдаж, бүтээмж огцом буурч эхэлдэг. Орноосоо босмооргүй, хаашаа ч гармааргүй, юу ч хиймээргүй болж эхэлнэ.

3. Хоолны дуршил өөрчлөгдөх

Нэг бол хэтэрхий их иднэ, нэг бол юу ч идэхээ болих болно. Нэг бол гэнэт тэсэрсэн мэт юуг ч хамаагүй ам руугаа чихэж эхлэх бол, заримдаа өөрийгөө албаар өлсгөх мэт хүсэж байсан ч идэж чадахаа больчихдог. Энэ мэтээр хооллолтод ихээхэн нөлөөлж, ходоод гэдэсний өвчинд нэрвэгдэх нь бий.

4. Толгойн өвдөлт

Толгой хүчтэй өвдөх, мөн энэ өвдөлт зогсохгүй байх магадлалтай. Эм уугаад ч намдахгүй тохиолдлууд байдаг. Энэ байдал хэрэв сайжрахгүй бол янз бүрийн өвчин, асуудлуудад нөлөөлж эхэлдэг бөгөөд заавал мэргэжлийн хүнд хандах шаардлагатай.

5. Булчингаар өвдөх

Яагаад гэдгийг тайлбарлахад бэрх хэдий ч булчин дагаж өвдөх тохиолдлууд байдаг байна. Бас үе үе бие халуу оргих, чичрэх тохиолдлууд ч бий.

6. Нойр өөрчлөгдөх

Байнга унтаад л баймаар эсвэл бүр нойргүйдэж орхих тохиолдлууд бий. Таны нойронд нөлөөлснөөр таны биеийн эрч хүч, сэтгэл хөдлөлд ч давхар нөлөөлдөг тул энэ тал дээр аль болох анхааралтай байх ёстой. Нойр дутуу удаан явах нь олон өвчний эхлэл болох эрсдэлтэйгээс гадна хэрэв хэт удаан унтвал толгойн өвдөлт, зүрхний өвчлөл гээд маш олон эрсдэл дагуулдаг байна.

О.Анхзаяа 2022.08.18

2