Улсын Их Хурлын 2024 оны сонгуулийн дүнгээр бүрэлдсэн чуулганы анхдугаар хуралдаанаар УИХ-ын даргыг сонгох санал хураалт явуулж, хуралдаанд оролцсон гишүүдийн олонх гар өргөж Дашзэгвийн Амарбаясгаланг Монгол Улсын Их Хурлын даргаар сонгохыг дэмжлээ.
УИХ-ын чуулганы дэгийн тухай хуулийн 19 дүгээр зүйлийн 19.3-т “Улсын Их Хурлын даргыг сонгоход хэлэлцүүлэг явуулахгүй бөгөөд ил санал хураалт явуулж, хуралдаанд оролцсон гишүүдийн олонх дэмжсэн бол Улсын Их Хурлын даргыг сонгох тухай тогтоол баталсанд тооцно” хэмээн заасан байдаг.
