Ням гарагийн үдэш Америк даяараа олд скүүл хип хопоор амьсгаллаа. Америкийн Үндэсний хөлбөмбөгийн 56 дахь удаагийн лигийн аварга шалгаруулах Супер Боул тэмцээний хагас цагийн завсарлагаанаар Dr.Dre, Snoop Dogg, Mary J.Blige, Eminem, 50 Cent, Kendriсk Lamar нарын уран бүтээлчид шоу үзүүлбэрээ толилуулсан нь энэхүү шоуны тайзан дээр анх удаа хип хоп дуучид гарсан түүхэн үйл явдал болов.
Лос Анжелес хотод 30 жилийн дараа дахин зохиогдож буй энэхүү аваргын тулааныг SoFi цэнгэлдэх хүрээлэнд 100 мянга гаруй хүн үзсэн ба тасалбарын үнэ суудлын байршлаасаа хамаараад 2800 - 35.000 доллар байлаа. Өнгөрсөн жилийн Cупер Боулын үеэрх 30 секундын сурталчилгаа 1 сая долларын ханштай байсан бол энэ жил 6.5 сая доллар хүрсэн юм.
Энэ удаагийн шоуг бүх цаг үеийн хамгийн супер, амьдралд ганц тохиох шоу болно гэж таамаглаж байсанчлан нүсэр болсныг тэмдэглэх нь зүй. Шоуг Dre, Snoop Dogg нар нээж, оргил хэсэгт Eminem Оскарын шагналт “Lose Yourself” дуугаа дуулахад цэнгэлдэх хүрээлэн тэр аяараа босож ирсэн юм. Тэрээр дуулж дуусаад нэг минутын турш өвдөглөн сууж, алдарт хөлбөмбөгчин Колин Каперникийн 2016 оны АШТ-ий үеэр арьс өнгөний үзэл ба цагдаа нарын харгислалыг эсэргүүцэн өвдөглөж суусан алдартай суултыг дуурайсан нь анхаарал татлаа. Mөн Dr.Dre 1996 онд буудуулж нас барсан домогт Тупак Шакурын дурсгалыг хүндэтгэн түүний “I ain’t Mad At Cha” дууны хэсгээс төгөлдөр хуур дээр тоглосон нь гайхалтай байв.
Ташрамд энэ удаагийн аваргын цомын төлөө Цинцинатти Бенгалс, Лос Анжелес Рамс багууд тоглож, 20: 23 харьцаагаар нутгийн баг Л.А Рамс баг хожиж, цомоо өргөлөө.
