1 мин

Шинэ Зеланд улс хүүхэд нь зулбасан гэр бүлд цалинтай чөлөө олгох хууль баталлаа

Б.Саруул 2021.03.26 2

Шинэ Зеландын парламент үр зулбалт болон амьгүй төрөлтийн улмаас шаналж буй хосуудад гурав хүртэлх өдрийн цалинтай чөлөө олгох хууль баталлаа. 

Тус хуулийг санаачилсан парламентын гишүүн Жинни Андерсен "Энэ хууль нь эмэгтэйчүүд болон тэдний хамтрагчдад өвчний чөлөө авахгүйгээр гашуудлаа даван туулах цаг хугацааг олгож байгаа юм. Уй гашуу бол өвчин биш,  энэ бол гарз хохирол. Үүнийг туулахад цаг хугацаа шаардлагатай" гэж ярьсан байна. 

Жинни Андерсен

Түүний хэлж буйгаар Шинэ Зеландад дөрвөн эмэгтэй тутмын нэг нь үр зулбасан байдаг ба шинэ хууль батлагдсанаар үр зулбалттай холбоотой нийгэмд тогтсон хандлага өөрчлөгдөж, эмэгтэйчүүд энэ талаар нээлттэй ярилцах, тусламж авах боломж бүрдэнэ хэмээн итгэж байгаа аж. 

Ийнхүү Шинэ Зеланд улс үр зулбасан эмэгтэйчүүдэд чөлөө олгодог дэлхийн хоёр дахь улс болж байна. CNN-ээс мэдээлснээр, Энэтхэг улсад үр зулбасан эмэгтэйчүүдэд зургаан долоо хоног хүртэлх чөлөө олгодог гэнэ. 

Эх сурвалж: Daily Mail 

Б.Саруул 2021.03.26