Жефф Безос бага орлоготой айлын хүүхдүүдэд зориулж үнэгүй цэцэрлэг нээжээ
Амазон компанийн үүсгэн байгуулагч, гүйцэтгэх захирал Жефф Безос бага орлоготой айлын хүүхдүүдэд сургуулийн өмнөх боловсролыг үнэгүй олгох Безос академийг нээхээр болсноо мэдэгдлээ. Безос академи аравдугаар сарын 19-өөс үйл ажиллагаагаа албан ёсоор эхлэх бөгөөд Безос инстаграмдаа Де-Мойн хотод байрлах цэцэрлэгийн зургийг тавиад "Энэ бол удахгүй нээгдэх олон олон цэцэрлэгийн ердөө эхлэл нь" хэмээн тайлбарлажээ.
Безос академийн сайтад бичсэнээр, айл өрхүүдийн амьжиргааны түвшин, хүүхдүүдийн үнэгүй болон хөнгөлөлттэй үдийн хоолонд хамрагдсан байдал зэрэг олон хүчин зүйлийг харгалзаж үзсэний үндсэн дээр Де-Мойн хотод эхний цэцэрлэгийг нээхээр болсон байна. Долоо хоногийн таван өдөр хичээллэх уг үнэгүй цэцэрлэгт доогуур орлоготой гэр бүлийн 3-5 настай хүүхдүүд хамрагдах аж. Мөн цэцэрлэг практик, хамтын ажиллагаа, аливааг хүүхдээр өөрөөр нь хийлгэх зарчимд тулгуурладаг монтессори сургалтын хөтөлбөрөөр хичээллэх гэнэ.
Жефф Безос 2018 онд сургуулийн өмнөх боловсрол олгох байгууллагуудын сүлжээг байгуулахаар болсноо мэдэгдэж байсан юм. Тэрбээр Bezos Day One сандаа 2 тэрбум долларын хөрөнгө оруулалт хийсэн бөгөөд орон гэргүй хүмүүст чиглэсэн үйл ажиллагаа явуулдаг ашгийн бус байгууллагуудыг дэмжих, цэцэрлэг барих гэсэн хоёр үндсэн зорилгыг тавьжээ.
Эх сурвалж: Forbes