"Моханик" хамтлагийн тоглолт болоход 8 хоног үлдлээ
Одоогоос 15 жилийн өмнө буюу 2004 онд "Моханик" хамтлаг анх ахлах сургуулийнхаа урлагийн үзлэгт зургаан гишүүний бүрэлдэхүүнтэй орсон цагаас эхлэн Монголын хөгжмийн урлагт өөрсдийн гэсэн өнгө төрхөөрөө шүтэн бишрэгчдээ хөглөсөөр ирсэн билээ.
Тэгвэл тэд 15 жилийнхээ ойг тохиолдуулан "Road to Mohanik" тоглолтоо энэ сарын 20-ны өдөр Улсын дуурь бүжгийн эрдмийн театрын тайзнаа толилуулах гэж байна.
Тоглолтод тус хамтлаг 2014 онд гаргасан “Моханик Амарбаясгалантад” цомгоо анх удаа бүрэн эхээр нь концерт болгон тоглох юм. Уг цомогт багтсан уран бүтээлүүдээ зохиохдоо тухайн дуу хөгжмийн өнгө аяс, утга агуулгад нийцүүлэн эх нутаг, байгалийн өвөрмөц тогтоц, нүүдэлчин ахуй амьдралын хэв маяг, соёл, сэтгэлгээ бүрдсэн Монголын сайхан нутгийн гайхалтай газруудаар аялж, мөн чанарыг нь эрэлхийлэхийг зорьсон байдаг. Уг цомгийн дуу болон бичлэгийг Сэлэнгэ аймгийн “Амарбаясгалант” хийдэд дүрсжүүлсэн ажээ.
Тэдний шинэ хөгжим, аялгуугаа хайж туулсан бүхий л үйл явц, тоглолтууд, мэдрэмжүүд нь нэгдэн одоогийн "Моханик"-ийг бий болгосон билээ.
Хэрвээ та тус хамтлагийн уран бүтээлүүдийн талаар төдийлөн мэддэггүй бол "Зөөлөн мишээл" дууг нь сонсоод үзэхийг зөвлөж байна.
Freddie 2019.09.12 103.10.22.19
Hog duugn shaatsan bhin
0 1 Хариулах