Сар шинийн өдрүүдэд Улаанбаатараас орох, гарах хөдөлгөөнийг хаалаа
Сар шинийн өдрүүдэд буюу энэ сарын 23-ны 08.00 цагаас 27-ны 08.00 цаг хүртэл улс, хот хоорондын тээврийг зогсоох шийдвэрийг Улсын Онцгой комиссоос гаргалаа. Тодруулбал, энэ хугацаанд автобус, галт тэрэг, автомашинаар Улаанбаатараас орох, гарах, аймгуудаас орох гарах хөдөлгөөнийг хааж буй бөгөөд үүнд нислэг хамаарахгүй юм байна.
Улсын Онцгой комиссын хуралдаанаар цагаан сарын баярыг тэмдэглэхгүй байх зорилгоор нийслэл, аймаг, сумын төвөөс гарах, орох иргэд, автомашины хөдөлгөөн, хот хоорондын тээвэр, нийслэлийн нийтийн тээврийн чиглэлийг улс орон даяар хязгаарлах талаар хэлэлцсэн юм.
Засгийн газар өчигдөр хуралдаад хөл хорионы дэглэмийг дахин нэг сараар сунгах асуудлыг хэлэлцээд, бүх төрлийн боловсролын байгууллагын үйл ажиллагааг гуравдугаар сарын 30-ныг хүртэл хязгаарлахаар шийдвэрлэсэн билээ.