1 мин

Судалгаа: Ширээний ургамал стрессийг мэдэгдэхүйц хэмжээгээр бууруулдаг болохыг тогтоожээ

Б.Саруул 2020.01.22

Японы Хёго их сургуулийн судлаачид саяхан ширээний ургамалтай холбоотой шинэ судалгааны үр дүнг танилцуулжээ. Дээрх судлаачдын хэлж буйгаар, ширээн дээрээ ургамал тавих нь ажлын байран дахь стрессийг мэдэгдэхүйц хэмжээгээр бууруулдаг гэнэ.

Судалгааны баг Японы нэгэн цахилгаан компанийн оффисын ажилчдын дунд туршилт хийсэн байна. Тэд эхний долоо хоногт ямар нэгэн ургамал байрлуулахгүйгээр ажиглалт явуулж, судалгаанд оролцогчдын бие махбод, сэтгэл санааны байдлыг танджээ. Харин дараагийн дөрвөн долоо хоногт ажилчдын ширээн дээр ургамал байрлуулж, тэдгээрийг арчлах, зорилготойгоор харах зэргээр ургамалтай харьцах үед судасны цохилт нь хэрхэн өөрчлөгдөж байгааг хэмжсэн байна. Ингэхэд, ургамалтай харьцах үед хүмүүсийн судасны цохилт хэвийн үеийнхээс хэд дахин багасаж, сэтгэл түгшил буурч байгаа нь ажиглагджээ. Ажлын өдөр бүрийн төгсгөлд авч байсан сэтгэлзүйн сорилууд ч үүнийг баталжээ.

Өдөрт ердөө 3 минутын завсарлага авч, амьд ургамалтай харьцах нь ажилчдын сэтгэл санаа төдийгүй бие махбодод эерэгээр нөлөөлж, стрессийн түвшинг бууруулж байна гэж Хёго их сургуулийн эрдэмтэд дүгнэжээ. Түүнчлэн ямар төрлийн ургамал байхаас үл хамаарч үр дүн нь ижил байгааг онцлон тэмдэглэсэн байна. Иймд ажлын ширээн дээрээ жижиг ч болов ургамал байрлуулж, түүнийгээ арчилж тордоорой.

Эх сурвалж: People