Усны саванд хийж голд урсгасан захидлынхаа ачаар аврагджээ
Хавайд явган аялал хийж явсан Уитсоны гэр бүл 15 метр өндөр хүрхрээт хавцалд гацсаны улмаас ууж явсан усныхаа саван дээр "HELP" буюу "Туслаарай" хэмээн сийлж, дотор нь тусламж хүссэн захидал хийн голд урсгажээ.
Тэдний авралын цор ганц найдвар болсон захидлыг гол даган урсаж явахад нь хоёр аялагч олж, аврах багийнханд мэдэгдсэн байна. Аврах багийнхан Уитсон, түүний хүү Кертис, эхнэр Рамирез нарыг дуудлага авснаас даруй хэдхэн цагийн дараа эсэн мэнд олсон аж. "Хэрэв тэд захиагаа ийм байдлаар илгээгээгүй бол тэдний хувь тавилан бүрхэг байх байсан. Тэд их азтай байлаа" гэж аврах багийн гишүүн Тодд Бретур ярьжээ.
АНУ-ын Калифорни мужид шилэн хаалганы засварчин хийдэг Уитсон тэрхүү захиаг нь олж, амийг нь аварсан аялагчдыг хайж олохыг хүсэж байгаа ажээ. Тэр ногоон өнгийн усны саван дээр "Туслаарай" хэмээн сийлж, хүрхрээг давуулан шийдсэн нь азаар голд унаж тэд ийн аврагдсан байна.