Та бүхэнд дэлхийн рекорд тогтоосон алдарт болон нэг их алдар хүндгүй кинонуудыг танилцуулж болно. Амжилт, мөнгө олоогүй ч Гиннесийн рекорд тогтоосон гэдгээрээ түүхэнд үлдэж яагаад болохгүй гэж.
Ганди (1982)
Рекорд: Олны хэсэгт тоглосон хүний тоо – 300 мянга.
Оршуулгын ёслолын зурагт 300 мянган хүн оролцсоны 200 мянга нь сайн дурынхан байжээ. Өөрөөр хэлбэл 100 мянган хүн зөвхөн энэ үзэгдлээс цалин авсан байна. Аймшигтай.
Paw Patrol: The Mighty Movie (2023)
Рекорд: Нээлтийн ёслол дээр ирсэн нохойны тоо - 219.
Нээлт 2023 оны есдүгээр сарын 23-нд Лос-Анжелест болсон. Нохойны тухай кино нохойнд хэрэгтэй эсэхийг мэдэхгүй ч ямар ч гэсэн дэлхийн рекорд.
Breakfast at Tiffany's (1961)
Рекорд (2): Дуудлага худалдаагаар зарагдсан хамгийн үнэтэй хувцас, хамгийн үнэтэй киноны зохиол.
2006 онд Лондоны Сhristie’s дуудлага худалдаагаар гол баатар эмэгтэйн өмсөж байсан хар даашинз 807 мянган ам.доллароор зарагдсан. Харин Одри Хепбернийн тэмдэглэл бүхий киноны ажлын зохиол нь 2017 онд 847,000 доллароор борлогдсон байна.
The Owner (2012)
Рекорд: Нэг кинонд оролцсон найруулагчийн тоо - 25.
13 орны 25 найруулагч 94 минутын энэ кинон дээр ажилласан. Хүн бүр 2-5 минут хэсэг зураг авсан. Тэд хоорондоо санал зөрж, муудалцсан эсэх нь тодорхойгүй.
Veronica Mars (2014)
Рекорд: Интернэтээр дамжуулж, хамгийн их мөнгө босгосон кино - 5 702 153 доллар.
Төсвийн 6 сая ам.долларынхаа ихэнхийг нь Kickstarter сервисээр босгосон. Warner Bros студи санхүүжүүлэхээс татгалзсан тул найруулагч Роб Томас болон гол дүрийн Кристен Белл нар хандивын ажил зохион байгуулснаар нийт 91 585 үзэгч энэ мөнгийг илгээжээ.
Pirates (1986)
Рекорд: Хамгийн үнэтэй тайз засал.
Энэ кинонд зориулан, 17 дугаар зууны Нептун хөлгийг яг ориг хэмжээгээр нь, хуучны зургаар нь босгосон. Үүнд 10 сая ам.доллар зарсан нь киноны төсвийн 25 хувь нь болсон байна. Одоо энэ хөлөг онгоц Генуя хотын боомтод жуулчдын үзэх дуртай үзмэр болжээ.
The Fall Guy (2024)
Рекорд: Дотроо орлон тоглогчтой машин осолдон, эргэлдэн унасан тоо - 8.
Энэ орлон тоглогчийн нэрийг Логан Холладей гэдэг. Тэр гэмтэж бэртээгүй, эрүүл энх байгаа. Өмнөх рекорд 7 байсныг нэгээр ахиулжээ.
The Other Side of the Wind (2018)
Рекорд: Хамгийн удаан хийсэн кино - 48 жил.
Домогт найруулагч Орсон Уэллс энэ киног 1970-1976 онд хийж байсан ч санхүү дутаад дуусгаж чадсангүй. 1985 онд Уэллс нас барсан байна. 2014 онд киноны эрхийг Royal Road компани авч, найруулагч Фрэнк Маршалл 2018 онд дэлгэцэнд гаргажээ. Киног бүтээсэн 48 жилийн тухай Netflix дээр баримтат кино бий.
Бэлэвсэн эмэгтэйн төлөөх хоёр эрийн цуст тулаан – улс төрийн шалтгаантай байж магадгүй гэсэн сэжиг байна - (Итали, 1978)
Рекорд: Хамгийн урт нэр.
Ориг, итали нэр нь “Fatto di sangue fra due uomini per causa di una vedova — si sospettano moventi politici”. Энэ киног зөвхөн нэрээрээ алдаршсан гэж бодож болохгүй. Софи Лорен, Марчелло Мастроянни тоглосон кино шүү.
Armour Of God 3 (2012)
Рекорд: Нэг хүний нэрийг хамгийн олон удаа титр дээрээ дурдсан – 15 албан тушаал.
Энэ бол Жеки Чан. Титр дээр Чаныг найруулагч, сценарист, жүжигчин, продюсер, гүйцэтгэх продюсер, оператор, арт-директор, менежер, орлон тоглогч, зөвлөх, хөгжмийн зохиолч, дуучин гэж бичигдсэн. Хамгийн хачирхалтай нь гэрлийн оператор, тайз засагч, хоол ундны зөвлөх гэж хүртэл заасан байлаа.
007: Spectre (2015)
Рекорд (2): Хамгийн том дэлбэрэлт, хамгийн үнэтэй хувцасласан дүр.
Мароккод болсон зураг авалт дээр 8140 литр керосин, 24 багц бодис ашиглан, дэлбэрэлт хийсэн нь Гиннесийн номд бичигджээ. Мөн Дэниел Крейгийн баатар нь нийт 56 мянган ам.долларын үнэтэй хувцас, гоёлтой гарч ирсэн байна. Тэрээр 4 ширхэг Tom Ford хослол захиалсан нь нэг нь 3805 - 4881 доллар байжээ. Мөн 1248 ам.долларын үнэтэй Matchless Craig Blouson хүрэм, 6871 долларын Omega Seamaster 300 цагтай байв.
Kids in America (2005)
Рекорд: Хамгийн удаан үнсэлт - 6 минут 44 секунд.
Инээдмийн мелодрам энэ кино төгсөхдөө хоёр гол баатар нь үнсэлцсээр байдаг. Титр урсаад л, камер нэг холдож, ойртоод, баатрууд үнсэлцсээр л.
