АНУ-ын 47 дахь Ерөнхийлөгчөөр сонгогдсон Дональд Трамп тангаргаа өргөж, албан ёсоор ажилдаа орлоо. Сүүлийн 40 жилд анх удаа тангараг өргөх ёслол Конгресст буюу дотор явагдсан юм.
Трамп үүнийг цаг агаар хүйтэн байгаагаар тайлбарласан ч үнэндээ өчигдөр Вашингтонд ердөө -4 хэм хүйтэн байлаа.
Тангараг өргөх ёслолын өмнө Трамп уламжлал ёсоор Гэгээн Иоаннагийн сүмд очсон. Энд TikTok-ийн Ерөнхий захирал Чу Шоу Цзы, SpaceX, Tesla-гийн эзэн Илон Маск, Apple-ийн босс Тим Кук, медиа магнат Руперт Мердок, Аргентины Ерөнхийлөгч Хавьер Милей нар ирсэн байлаа.
Дараа нь Дональд Трамп гэргийн хамт Цагаан ордонд очиж, хуучин Ерөнхийлөгч Жо Байден, түүний гэргий Жилл нартай уламжлал ёсоор үдэлтийн цай уулаа. Энэ нь засгийн эрхийг энх тайван замаар шилжүүлэн өгсөн гэсэн утгатай.
Жо Байден Трампад захидал үлдээсэн ч агуулгыг нь хэн ч мэдэхгүй байна. Энэ ч гэсэн бас 1989 оноос эхэлсэн уламжлал. Тэр үед Рональд Рейган Жорж Бушид захидал бичиж байсан юм.
Шинэ дэд Ерөнхийлөгч Жей Ди Вэнс мөн гэр бүлийн хамт Цагаан ордонд ирэхэд ажлаа өгч байгаа хуучин дэд Ерөнхийлөгч Камала Харрис нөхрийн хамт хүлээн авсан.
Цай ёслолын дараа Трамп, Байден хоёр нэг машинаар Капитолид очсон юм.
АНУ-ын Ерөнхийлөгч нар Библи дээр тангараг өргөдөг ёстой. Трамп энэ удаад 1861 онд Авраам Линкольн хэрэглэсэн Библиг, өөрийн Библитэй хамт ашиглалаа.
Ингээд АНУ-ын 47 дахь Ерөнхийлөгч ажилдаа орж байгаа юм. Цэргийн жагсаал болж, ёслолын буудлага болсон.
Тангараг өргөхдөө Трамп “Америкийг нэгдүгээр байрт аваачна” гээд “АНУ-ын алтан үе одоо эхэлж байна” гэж амалсан. Мөн хууль бус цагаачид, байгалийн гамшиг, үндэсний аюулгүй байдал, эрүүл мэнд,боловсрол гээд олон салбарын тухай ярьсан байна.
