Монгол Улсын Консерватори, “Aydu Music for All” ТББ-аас Б.Зоригтын нэрэмжит мэргэжлийн цохивор хөгжимчдийн улсын анхдугаар уралдааныг зохион байгуулж, шилдгүүд нь шалгарлаа.
Монгол Улсын Гавьяат багш, Дэд проффесор Б.Зоригт нь 1985 онд Казахстаны Курмангазийн нэрэмжит консерваторийг цохивор хөгжмийн мэргэжлийн багш, симфони найрал хөгжмийн гоцлол хөгжимчний мэргэжлээр дүүргэсэн. Төгсөж ирмэгцээ цохивор хөгжмийн сургалт арга зүйг академик түвшинд дээшлүүлэх олон ажлыг манлайлж, улмаар цохивор хөгжмийн чуулгыг байгуулжээ. Мөн дотоод гадаадын 150 гаруй сонгодог зохиолыг найруулан тавьж, 50 гаруй мэргэжлийн цохивор хөгжимчдийг төрүүлэн гаргасан юм. Түүнчлэн Хөдөлмөрийн баатар, Төрийн соёрхолт, УГЗ Б.Шарав түүнийг тайз дэлгэцийн томоохон бүтээлүүддээ хэдэнтээ урьж тоглуулсан нь Б.Зоригтын хөгжимчний чансааг илтгэсэн явдал юм.
Энэ удаагийн уралдааныг Монголын болон олон улсын таван шүүгч шүүн цэгнэсэн юм.
Мексик улсын маримба хөгжимчин Хавиэр Нандаяа- Тэрээр мексик маримбын онцгой дуугаралтын төлөөлөгчдийн нэг бөгөөд 15 жилийн хөгжимчний туршлагатай нэгэн юм. 2022 оноос хөгжмийн зохиомжийг гүнзгий судалснаар өөрийн анхны маримба, симфони найрал хөгжмийн дэлхийн концертийн нээлтийг Монгол улсад хийсэн билээ. Хавиэр Нандаяапа мөн “Монголчуудын уламжлал, өв соёлоо хадгалан тээж байгаа, найрсаг чанар надад гүн сэтгэгдэл үлдээсэн” хэмээн онцлов.
Греммийн шагналд нэр дэвшигч Линн Вартан- Техасын сургуулийн багш, хөгжмийн ухааны доктор, Грэммийн шагналд нэр дэвшигч Линн Вартан уралдааны шүүгчдийн бүрэлдэхүүнд ажилласан төдийгүй ‘’Percussion Event’’-д Шинэ Зеланд-Грек хөгжмийн зохиолч Иоаннис Жон Сатасын “Бүхнийг ширтэх тэнгэр” бүтээлийг хамтрагч Вейчен Линтэй хоршин толилуулсан.
Тайванийн маримба хөгжимчин Вейчен Линн- Чиа Игийн их сургуулийн дэд профессор, Бостоны их сургуулийн маримба хөгжмийн багш Вейчен Линн “Өнгөрсөн жил би Монголд үзүүлбэр үзүүлэхээр ирж байсан бол энэ жил цохивор хөгжимчдийн анхдугаар тэмцээний шүүгчээр ажиллахаар ирсэн нь миний хувьд нэр төрийн хэрэг” хэмээсэн. Тэрээр Линн Вартантай ‘’Duo Lin-Lynn’’ хамтралд хөгжимддөг, туршлагатай уран бүтээлч билээ.
Уралдаанд гурван ангилалд 12-24 насны нийт 29 оролцогч оролцсоноос 11 нь шагналт байранд, нэг оролцогч шүүгчдийн нэрэмжит шагналын эзэн болж, хаалтын ёслолд уран бүтээлээ толилуулсан. Шагналт байранд орсон оролцогчдыг танилцуулъя.
А ангилал:
Тэргүүн байр - Б.Марал
Дэд байр - С.Гүен
Гутгаар байр - Н.Азтүшиг
Тусгай байр - Т.Хастөр
В ангилал:
Тэргүүн байр - Э.Мөнх-Оргил
Дэд байр - Б.Тэмүүлэн
Гутгаар байр - Х.Танхилуун
Тусгай байр - Б.Ихмөрөн
С ангилал:
Тэргүүн байр - Д.Жавхлантөгс
Дэд байр - Б.Алтантуул
Гутгаар байр - Б.Билгүүн-Эрдэнэ
Шүүгчдийн нэрэмжит шагнал: С.Алтангэрэл
Ийнхүү гуравдугаар сарын 10-14-ний өдрүүдэд тэмцээн амжилттай зохион байгуулагдаж, тэмцээний хаалт ёслол төгөлдөр болж өндөрлөлөө. Уралдаан зохион байгуулагдсанаар мэргэжлийн цохивор хөгжимчдөд дэлхийн болон Монголын сор болсон бүтээлүүдийг хөгжимдөж чадвараа сорих боломжийг олгож, дараа дараагийн цохивор хөгжмөөр суралцаж буй сурагчдад урам зориг өгсөн үйл явдал боллоо.
Бэлтгэсэн: Б.Цагаандалай
