АНУ-ын Forbes USA сэтгүүлээс 39 дэх удаагаа дэлхийн тэрбумтнуудын чансааг гаргалаа. Дэлхийн хамгийн баян тэрбумтнаар Tesla, компанийн эзэн, Дональд Трампын засгийн газрын ажилтан Илон Маск 342 тэрбум ам.долларын хөрөнгөтэйгөөр шалгарлаа. Өнгөрсөн жилийн чансааны тэргүүн баян "Louis Vuitton Moët Hennessy” компанийн тэргүүн Бернар Арно тавдугаар байрт унасан бол Meta корпорацын босс Марк Цукерберг (216 тэрбум) эхний гуравт эргэн иржээ.
Энэ жил тэрбумтнуудын жагсаалтад 3028 хүн багтсан нь түүхэн амжилт байлаа. 2024 онд тэрбум хөрөнгөтэй 2781 хүн байжээ.
№1 Илон Маск
Хөрөнгө - $342 тэрбум (өнгөрсөн жилээс +$147 тэрбум)
Хөрөнгийн эх үүсвэр - Tesla, SpaceX
Нас - 53
Улс - АНУ
2022 оноос хойш дахин тэргүүн байрт жагслаа. Өнгөрсөн нэг жилд хөрөнгөө 147 тэрбум ам.доллароор ахиулжээ. Тэрээр цахилгаан машин Tesla, сансрын SpaceX хөлөг, хиймэл оюун ухааны xAI стартапаар гол орлогоо олж байна. Гуравдугаар сарын 29-нд маск X (Twitter) сүлжээгээ xAI стартапдаа 45 тэрбумаар зарсан. Энэ наймааны дүнд үүссэн XAI Holdings нь $100 тэрбумаар үнэлэгдэж байна.
№2 Марк Цукерберг
Хөрөнгө - $216 тэрбум ($39 тэрбум)
Хөрөнгийн эх үүсвэр - Meta
Нас - 40
Улс - АНУ
2023 онд чансааны 16-д унаад байсан Марк сэргэлт авлаа. Цукерберг болон түүний гэргий Присцилла Чан нар 2015 онд амьдралынхаа турш Facebook-ээс олсон орлогынхоо 99 хувийг сайн үйлсэд хандивлана гэж амлаж байлаа.
№3 Жефф Безос
Хөрөнгө - $215 тэрбум (+$21 тэрбум)
Хөрөнгийн эх үүсвэр - Amazon.com
Нас - 61
Улс - АНУ
Безос гуравдугаар байраа хадгалж чадлаа. 1994 онд машины гараашдаа нээсэн Amazon цахим дэлгүүр нь одоо болтол цэцэглэсээр. 2022 онд хүртэл тэр 4 жил дараалан энэ чансааг тэргүүлж байлаа. 2022 онд CNN-д ярилцлага өгөхдөө Безос нас барахаасаа өмнө бүх хөрөнгөө тараана гэж хэлж байсан билээ.
№4 Ларри Эллисон
Хөрөнгө - $192 тэрбум (+$51 тэрбум)
Хөрөнгийн эх үүсвэр - Oracle
Нас - 80
Улс - АНУ
Ларри Эллисон программ хангамжийн Oracle компанийг байгуулж, 1977 онд анхны үйлчлүүлэгч нь ТТГ болж байлаа. 2020 оноос хойш тэрээр Хавайн Ланаи арал дээр амьдарч байна. Энэ арлыг Ларри 2012 онд 300 саяар худалдан авсан юм.
№5 Бернар Арно ба түүний гэр бүл
Хөрөнгө - $178 тэрбум (-$55 тэрбум)
Хөрөнгийн эх үүсвэр - LVMH
Нас - 76
Улс - Франц
Givenchy, Fendi, Bulgari, Hublot, Tiffany & Co., Dom Pérignon зэрэг нийт 75 тансаг брэндтэй. Тэд Netflix болон TikTok-ийн эзэн компани ByteDance-д хөрөнгө оруулдаг. 2025 оны нэгдүгээр сард санхүүгийн тайлангаа гаргаад нэг өдөрт 11 тэрбумын алдагдал хүлээсэн.
№6 Уоррен Баффет
Хөрөнгө - $154 тэрбум (+$21 тэрбум)
Хөрөнгийн эх үүсвэр - Berkshire Hathaway
Нас - 94
Улс - АНУ
Уоррен Баффет хөрөнгө оруулалтын Berkshire Hathaway-ийн эзэн. Түүний гол активын дотор Apple, Coca-Cola, American Express, Bank of America, Chevron зэрэг томчууд бий. Тэрээр тун даруу амьдралтай. Одоо хүртэл 1958 онд 32 мянган ам.доллароор худалдан авсан байшиндаа амьдарч, гамбургер идэн, кока-кола уудаг. Хөрөнгийнхөө 99 хувийг хандивт өргөнө гэж амласан.
№7 Ларри Пейж
Хөрөнгө - $144 тэрбум (+$30 тэрбум)
Хөрөнгийн эх үүсвэр - Google
Нас – 52
Улс - АНУ
2019 онд толгой компанийн Ерөнхий захирлын албан тушаалаа өгсөн ч хувьцаа эзэмшигч хэвээр байгаа. Ларри сүүлийн үед хүний насыг уртасгах салбарт хөрөнгө оруулж байгаа. Тун нууцлаг амьдралтай, ярилцлага өгдөггүй.
№8 Сергей Брин
Хөрөнгө - $138 тэрбум (+$28 тэрбум)
Хөрөнгийн эх үүсвэр - Google
Нас - 51
Улс - АНУ
1998 онд Брин, Пейж хоёр Google-ийг машины гарааштаа үүсгэж байлаа. Одоо Брин хиймэл оюун ухаан, сансрын технологи, био технологи сонирхдог болсон.
№9 Амансио Ортега
Хөрөнгө - $124 тэрбум (+$21 тэрбум)
Хөрөнгийн эх үүсвэр - Zara
Нас - 89
Улс - Испани
Амансио Ортега бол хувцасны бөөний худалдааны хамгийн том төлөөлөгч. 1975 онд Inditex компани, алдартай сүлжээ дэлгүүр Zara-г үүсгэн байгуулсан. Massimo Dutti, Bershka, Stradivarius, Pull&Bear, Oysho мөн тэднийх. Нийтдээ 90 оронд 6000 дэлгүүртэй.
№10 Стив Балмер
Хөрөнгө - $118 тэрбум (-$3 тэрбум)
Хөрөнгийн эх үүсвэр - Microsoft
Нас - 68
Улс - АНУ
Стив Балмер бол Microsoft-ийн Ерөнхий захирал асан. Билл Гейтсийн урилгаар 1980 онд компанид орж байжээ.
