Америкийн алдарт жүжигчин Вэл Эдвард Килмер 65 насандаа таалал төгссөн тухай мэдээлэл цацагдлаа.
Вэл Килмер 1959 оны 12-р сарын 31-нд АНУ-ын Лос-Анжелес хотод төрсөн. Тэрээр Холливудын урлагийн ахлах сургуульд суралцаж, дараа нь Жулиардын сургуулийн драмын ангид элсэн орсон нь түүний жүжигчний замналын эхлэл байв.
Килмерийн анхны томоохон амжилт нь 1984 онд гарсан "Top Secret!" инээдмийн кино байлаа. Үүний дараа тэрээр "Real Genius" (1985), "Top Gun" (1986) зэрэг кинонуудад тоглож, олон улсын алдарт хүрсэн юм. Тэрээр Жим Моррисоны дүрийг "The Doors" (1991) кинонд бүтээж, "Batman Forever" (1995) кинонд Бэтменийн дүрийг амжилттай бүтээсэн нь уран бүтээлийн оргил үе болсон билээ.
2015 онд Вэл Килмерт улаан хоолойн хорт хавдартай хэмээн оношлогдсон бөгөөд энэ талаар түүний найз, жүжигчин Майкл Дуглас мэдээлж байв. Килмер эмчилгээнд хамрагдаж, эрүүл мэндийн байдал нь сайжирсан ч, өвчний улмаас хоолойны өнгө нь өөрчлөгдөж, ярих чадвар нь буурсан юм. Гэсэн хэдий ч тэрээр уран бүтээлээ үргэлжлүүлж, 2020 онд өөрийн амьдралын тухай "Val" нэртэй баримтат киног гаргасан нь үзэгчдээс өндөр үнэлгээ авсан билээ.
