Өнөөдөр Олон улсын хүүхдийн номын өдөр. Их Британийн зохиолч Филип Пулман “Хүүхдийн зохиол маш чухал. Яагаад гэвэл бид том болсон хойноо ч багадаа уншсан номоо дурсан санасаар байдаг” гэж хэлжээ. Түүний "Туйлын туяа" ном BBC-гээс гаргасан Бүх цаг үеийн шилдэг 100 хүүхдийн номд багтсан юм. BBC энэхүү чансаагаа дэлхий даяар хүүхдийн зохиолч, зураач, хэвлэлийн газар, номын санч, уншигч нарын дунд явуулсан асар том судалгааны дүнд гаргажээ. Судалгаанд оролцогчид санал болгосон 1000 хүүхдийн номоос дуртай арван номоо сонгох ёстой байлаа.
Ингээд бид энэ жагсаалтын эхний арван байрын номыг танилцуулж байна.
“Мангасуудын оронд” (Морис Сендак, 1963)
Морис Сендак номоо бичээд зогсохгүй зургийг нь ч зурсан. 1964 онд тэрээр Америкийн хамгийн шилдэг хүүхдийн зурагтай номд олгодог Кальдекоттын медаль хүртсэн билээ.
“Алиса гайхамшгийн оронд” (Льюис Кэрролл, 1865)
Маш олон хэл дээр орчуулагдсан ч утга зохиол судлаач нар энэхүү үлгэр нь англи аман зохиол, хэллэгээр бичигдсэн тул үгчлэн орчуулахад хамаг хурц үг, хошин байдал, цаад санаа нь алдагддаг гэж үздэг.
“Урт оймст Пиппи” (Астрид Линдгрен, 1945)
Швед зохиолч Линдгрен энэ чансаанд хэд хэдэн зохиолоороо орсон.
“Бяцхан хун тайж” (Антуан де Сент-Экзюпери, 1943)
Энэ номыг Антуан Францаас АНУ-д ирснийхээ дараа Нью-Йоркт бичиж, хэвлүүлжээ.
“Хоббит: Алсад зорчсон тэмдэглэл” (Жон Р. Р. Толкин, 1937)
Энэхүү зохиолдоо Толкин анх удаа хийсвэр ертөнцийг дүрсэлсэн нь дараа нь гарах “Бөгжний эзэн” романы ертөнц болж өгсөн юм.
“Хойд туйл” (Филип Пулман, 1995)
Гурвалсан романы эхний хэсэг. 2007 онд энэ зохиолоор кино хийж, Николь Кидман, Дэниел Крейг, Ева Грин нар тоглож байлаа.
“Арслан, шулам ба шүүгээ” (Клайв Льюис, 1950)
“Нарниагийн товчоон”-ы нэгэн хэсэг болох зохиол юм. Библийн сургаал, Скандинавын домог, Эртний Грекийн үлгэр холилдсон энэ номоор 4 удаа кино хийсний сүүлийнх нь 2005 онд гарчээ.
“Винни-Пух” (Алан Милн, 1926)
Анхны хэвлэлийн зургийг алдарт улс төрийн шог зураач Эрнест Шепард зурсан. Алан Милн түүнийг хамтран зохиогчоороо тооцдог гэдгээ хэлсэн байдаг. Харин Шепард “Хүүхдийн ном дээр ажилласан нь алдаа боллоо. Үндсэн ажлын минь амжилт, алдар нэрийг энэ ном дарчихлаа” гэсэн байна.
“Шарлотт аалзны тор” (Элвин Брукс Уайт, 1952)
Вилбүр нэртэй торойг аварч байгаа аалзны тухай түүх. 2000 онд энэ номыг Publishers Weekly сэтгүүлийн газраас Хамгийн олон зарагдсан зөөлөн хавтастай хүүхдийн номоор шалгаруулжээ.
“Матильда” (Роальд Даль, 1988)
Шилдэг хүүхдийн зохиолын чансаа болгонд багтдаг ном. 1996 онд найруулагч Дэнни Де Вито кино бүтээсэн. Аудио номыг нь жүжигчин Кейт Уинслет уншсан байна.
