Бага насанд туулсан гомдол, айдас, өвдөлт нь насанд хүрсэн хойно ч бидний хайр дурлалын харилцаанд нөлөөлж байдаг. Үүнийг бид заримдаа анзаарахгүй ч харилцаанд байнга давтагдах тодорхой зан үйлийг ажигласнаар олж харж болно. Хэрэв та өөрийн эсвэл хосынхоо үйл хөдлөлд дараах 7 шинж тэмдэг илэрч буйг мэдэрч байвал бага насны шарх хожмын амьдралд хэрхэн нөлөөлж байгааг бодож үзэх нь зүйтэй.
1. Бусдаас хэт хараат байдал эсвэл үл итгэх байдал
Зарим хүмүүс бага насандаа анхаарал халамж дутсанаас болж насанд хүрсэн хойно хосдоо хэт наалдах, эсвэл эсрэгээрээ огт итгэж чадахгүй байх хандлагатай болдог. Энэ нь өөртөө итгэлгүй байдал, айдастай хосолсноор харилцаанд үл ойлголцол үүсгэдэг.
2. Зөрчилдөөнөөс зайлсхийх эсвэл хэтэрхий их маргалдах
Хэрэв хүүхэд байхдаа маргаан, хэрүүлээс зугтаж сурсан бол насанд хүрсэн хойно ч зөрчилдөөнөөс зугтах эсвэл ямар ч асуудлыг нээлттэй ярилцахаас эмээдэг. Харин эсрэгээрээ, хэрүүлээр харилцааг зохицуулж сурсан хүмүүс ямар ч жижиг асуудлыг том сөргөлдөөн болгон хувиргах хандлагатай байдаг.
3. Өөрийгөө хангалтгүй мэт мэдрэх
Бага насандаа хайрыг нөхцөлтэйгөөр мэдэрч өссөн хүмүүс өөрийгөө бусдад хайрлуулах үнэ цэнгүй мэт мэдрэх нь элбэг. Үүнээс болоод тэд харилцаандаа хэт их хичээх, өөрийгөө золиослох эсвэл сайн сайхан хайрыг хүлээн зөвшөөрч чаддаггүй байж болно. Үргэлж бусдад таалагдахын тулд ямар нэг зүйл илүү хийх ёстой мэт мэдрэмж нь хамгийн ихээр зовоодог байна.
4. Хайр, халамжийг хүлээж авахдаа хүндрэлтэй байх
Зарим хүмүүс багадаа анхаарал, халамж бага хүртэж өссөнөөс болоод том болоод ч хэн нэгний өгч буй хайрыг зөвшөөрөхөд бэрхшээлтэй байдаг. Тэднийг хэт халамжилж, дотно байх гэж оролдох үед өөрийгөө эвгүй байдалд орсон мэт санаж, татгалзах нь элбэг.
5. Айдастайгаар хаягдахаас эмээх
Хүүхэд байхдаа орхигдож, гологдсон мэт мэдэрч байсан хүмүүс насанд хүрээд хосоосоо салах, орхигдон хаягдах айдастай болдог. Энэ нь тэднийг хэт хамааралтай болгох, эсвэл хэтэрхий өөрийгөө тусгаарлахад хүргэж болзошгүй. Ямар нэг үгэнд илүү эмзэглэж, хаяад явах нь гэх айдсаасаа болж маш их сэтгэл хөдлөл гарган, дэвэргэх үеүд ч бий. Яваандаа энэ нь цаашид харилцаа үүсгэхгүй байх шалтгаан болж хувирдаг.
6. Тогтвортой харилцаа үүсгэхэд хүндрэлтэй байх
Тогтворгүй, итгэлцэлгүй гэр бүлд өссөн хүмүүсийн хувьд хайр дурлалын харилцаа тогтвортой байх нь маш хэцүү санагддаг. Тэд хэн нэгэнд удаан хугацаанд итгэхээс зайлсхийж, харилцаагаа санаатайгаар эсвэл санаандгүйгээр өөрсдөө нураах хандлагатай байдаг.
7. Бусдыг өөрчлөх гэж оролдох
Зарим хүмүүс бага насандаа хайр, халамжийг байнга хүсэж, үгүйлж өссөнөөс болоод том болоод хосоо "засах", "аврах", "өөрчлөх" гэж оролддог. Энэ нь хайр гэхээсээ илүү хяналт, хүлээлтэд суурилсан харилцаа болж хувирдаг бөгөөд эцэстээ харилцааг туйлдуулдаг.
Бага насны траума бидний хайр дурлалын харилцаанд гүн гүнзгий нөлөө үзүүлдэг. Гэхдээ үүнийг ойлгож, ухамсарласнаар бид өөрсдийгөө эдгээж, илүү эрүүл, аз жаргалтай харилцааг бий болгож чадна. Хэрэв та өөрийгөө эсвэл хосоо дээрх шинж тэмдгүүдтэй нийцэж байна гэж бодож байвал сэтгэл зүйн зөвлөгөө авах, өөрийгөө илүү гүнзгий ойлгох алхмыг хийх нь зүйтэй.
