2022 оноос хойш хоёр жил өнжсөний дараа “Монгол орны хөгжилд” чуулган 18 дахь удаагаа Их Британийн Оксфордын их сургууль дээр тус улсад ажиллаж, суралцаж буй монгол залуусын дунд зохион байгуулагдах гэж байна. Уг чуулган анх 2005 онд Лондон хотод болж байсан түүхтэй. Тэгвэл энэ жил тавдугаар сарын 17-нд “Монголын ирээдүйн өнгө төрх- Future Scape of Mongolia” сэдвийн дор өрнөх юм.
Чуулган нь Их Британи улсад мэргэжлээрээ ажиллаж байгаа болон, их дээд сургуульд суралцаж буй монгол залуусын харилцаа холбоо, хамтын ажиллагааг хөгжүүлэх, мэдлэг туршлагаа хуваалцах, улмаар тэдний Монгол улсын хөгжил дэвшилд хувь нэмэр оруулах боломжийг нээхэд чиглэдэг. Түүнчлэн Монгол Улсын ирээдүйн хөгжилд судлаач, мэргэжилтнүүдийн эрдэм мэдлэг, соёлын солилцоо төдийгүй хиймэл оюуны оруулах хувь нэмрийг хэлэлцэх, уламжлалт мэдлэгийг дэвшилтэт технологитой хэрхэн уялдуулах талаар шинэ өнцгийг оролцогчдод таниулах орон зай болох ажээ.
Чуулганд дараах үндсэн гурван сэдвээр илтгэл, хэлэлцүүлэг өрнүүлнэ.
Хүний оюун сэтгэлгээ: Үндэсний хэл, соёл, уламжлалын онцлогоо ухамсарлан ойлгох, түүнийгээ эзэмшиж хэрэглэснээр хувийн болон мэргэжлийн замналдаа болон Монгол Улсын ирээдүйд оруулах хувь нэмэр, эерэг нөлөө.
Хиймэл оюун ухаан: Хүн төрөлхтний ирээдүйг тодорхойлогч гэгдэж буй хиймэл оюун ухаан болон хүний бүтээлч сэтгэлгээний харилцан хамаарлыг өөрсдийн уламжлалт онцлогт нийцүүлэн зохистой ашиглах замаар Монгол улсын мэдээллийн технологийн хөгжилд хувь нэмрээ оруулах.
Соёлын ухаалаг ялгарал: Даяаршин өөрчлөгдөж буй дэлхий ертөнцөд өөрийнхөө дахин давтагдашгүй онцлогийг хадгалан олон үндэстний соёлтой зэрэгцэн оршиход суралцсанаар Монгол улсын ирээдүйн хөгжил, бодлогын шийдвэр гаргах үйл ажиллагаанд нөлөөлөх ач холбогдол.
Чуулга уулзалттай холбоотой дэлгэрэнгүй мэдээллийг https://18th.md-forum.eu/ вэб хуудас болон Faceboook хуудсаас авах боломжтой.
