АНУ-ын засгийн газар 2024 оны 3-р сард TikTok-ыг эзэмшигч ByteDance компаниас платформыг зарахыг шаардсан. Хэрэв ByteDance TikTok-ыг зарахгүй бол АНУ-д уг аппликейшнийг хориглох нөхцөл үүснэ. Үүний улмаас хэд хэдэн томоохон компаниуд TikTok-ыг худалдан авах хүсэлтээ илэрхийлээд байгаа билээ.
Цахим худалдааны аварга компани Amazon болон насанд хүрэгчдийн OnlyFans-ийн үүсгэн байгуулагч Тим Стокли нар АНУ-д TikTok аппликейшний хориг тавигдахаас өмнө худалдан авах санал тавилаа. TikTok өмчлөлийн бүтцээ өөрчлөх буюу худалдах эцсийн хугацаа энэ бямба гарагт дуусах юм. Товчхондоо, TikTok-д хориг тавих хугацаа ойртож байгаа тул Amazon эцсийн мөчид худалдан авахаар зэхэж байна. Amazon компани TikTok-ийг худалдан авах хүсэлтээ АНУ-ын дэд ерөнхийлөгч Ж.Д. Ванс болон Худалдааны нарийн бичгийн дарга Ховард Лутник нарт илгээсэн. Гэвч энэ саналыг цаг хугацааны хувьд хожимдсон гэж үзэн, нухацтай авч үзэхгүй байгаа тухай эх сурвалжууд мэдээлжээ.
Amazon яагаад TikTok-ыг худалдан авахыг хүсч байна вэ?
АНУ-д 170 сая гаруй хэрэглэгчтэй томоохон платформыг өөрсдийн болгож чадвал TikTok-ийн Shop үйлчилгээ Amazon-той нэгдсэнээр дэлхийн хамгийн том цахим худалдааны тоглогч болох боломжтой. Жилээс жилд контент бүтээгчдийн зах зээл өргөжсөөр байгаа тул Amazon үүнийг ашиглахыг зорьж байна. Мөн Хятадын оронд АНУ-ын иргэдийн датаг өөрийн үүлэн технологи болох AWS-д хадгалахаар төлөвлөж буй аж.
Харин OnlyFans…
OnlyFans-ийн үүсгэн байгуулагч Тим Стокли болон бизнес эрхлэгч RJ Филлипс нар энэ лхагва гарагт TikTok-ийг худалдан авах хүсэлт гаргасан. Энэ саналыг “Zoop” гэх стартап компани болон Hbar Foundation-той хамтран гаргасан юм. OnlyFans-ийн амжилтаас улбаалан тэд TikTok-ийн санхүүгийн загварт өөрчлөлт оруулж, контент бүтээгчдэд илүү шууд орлого олох боломжийг бий болгохоор төлөвлөж байна. OnlyFans нь насанд хүрэгчдийн платформ учраас TikTok-ийн бодлого, чиглэлд хэрхэн нийцэх нь эргэлзээтэй. Мөн TikTok-ыг худалдаж авахад асар их хөрөнгө шаардлагатай бөгөөд тэдний санхүүжилтийн эх үүсвэр тодорхойгүй байгаа юм.
Түүнчлэн, Өмнө нь TikTok-ийн АНУ дахь өгөгдөл хадгалах үйлчилгээг хариуцаж байсан Oracle компани болон сурталчилгааны технологид голлон ажилладаг AppLovin TikTok-ийг худалдан авах хүсэлтэй байгаагаа илэрхийлжээ. Одоогоор уг платформыг худалдан авахаар санал болгосон хамгийн өндөр үнийн дүн 50 тэрбум ам.долларт хүрээд байна. Энэ нь ByteDance-ийн хөрөнгө оруулагчид болох Sequoia болон General Atlantic нарын санал юм.
АНУ-ын эрх баригчид TikTok-ийн асуудлыг 4 сарын 5-нд эцэслэн шийдвэрлэхийг зорьж буй. Гэсэн хэдий ч TikTok-ийг худалдах асуудал нь зөвхөн бизнесийн гэрээ хэлцлийн түвшинд бус, дэлхийн геополитикийн томоохон сэдэв болсон тул цааш хэрхэн өрнөх нь тодорхойгүй байна.
Бэлтгэсэн: Б.Цагаандалай
