Сэлбэ хот төслийн газар зөвшөөрөлгүй баригдсан барилгуудыг албадан буулгаж, барилгаас гарч буй төмөр, чулуу зэрэг барилгын материалыг ялган ангилж, дахин боловсруулж эхэллээ. Чингэлтэй дүүргийн 18 дугаар хороо, “7 буудал” орчимд стандартын шаардлага хангаагүй, зөвшөөрөлгүй барилгын карказыг холбогдох эзэдтэй нь хуулийн хүрээнд тохиролцож, албадан буулгаж байна. Барилгын хог хаягдлыг дахин боловсруулах үйлдвэр энэхүү барилгаас гарч буй төмөр, чулуу зэрэг барилгын материалыг ялган ангилж, дахин боловсруулж, ашиглах юм.
Сэлбэ хотын нийт төслийн хувьд 158 га газрын нөлөөлөлд 2206 иргэн, хуулийн этгээд өртсөн. Өнөөдрийн байдлаар 195 нэгж талбайг чөлөөлөх үлджээ. Энэ нь нийт зөвшилцлийн ажлын 91 гаруй хувь бөгөөд үлдсэн нэгж талбарын хувьд бичиг баримт зөрчилтэй, өмчлөгчийн асуудалтай зэрэг шалтгаанаар удааширчээ.
