Physical Asia: Японы хүчирхэг багийн хэн нь хэн бэ?
Netflix-ийн “Physical: 100” реалити шоу 2023 онд гарсан даруйдаа спорт сонирхогчдын анхаарлыг ихэд татсан билээ. Тус шоунд Өмнөд Солонгосын шилдэг 100 тамирчин оролцож, хурд хүч, авхаалж самбаагаа сорьсон. Олимп, дэлхийн аварга, мэргэжлийн тамирчид оролцсон тул үзэгчдийн хүрээ БНСУ төдийгүй дэлхийн өнцөг булан бүрт хүрч чадсан юм. Шоуны хоёр дахь улирал энэ жил дэлгэцэнд гарсан бөгөөд мөн л Өмнөд Солонгосын одод өрсөлдсөн. Энэ шоуны гол онцлог нь олимп, дэлхийн аваргуудын ур чадварыг шалгахаас гадна спортын олон төрлийн тамирчдын онцлог, ямар спортын тамирчин ямар дасгалд илүү байгааг харуулж байсан юм. Мөн цэрэг, гал сөнөөгч, тагнуул гэсэн тусгай албаныхан ч өрсөлдөж байлаа. Удалгүй Netflix платформоос Японы шилдэг тамирчдын “Physical: 100” шоуг зохион байгуулсан нь мөн л үзэлт, хандалтын тоогоор тэргүүлсэн. Тиймээс тус суваг Азийн шилдэг тамирчдын оролцсон “Physical: Asia” шоуг зохион байгуулахаар шийдвэрлэжээ.
Азийн шилдгүүдийн анхны “тулаанд” БНСУ, Япоя, Тайланд, Монгол, Турк, Индонез, Австрали, Филиппин гэсэн найман орны тамирчид өөрийн спортын төрөл төдийгүй улс эх орныхоо нэр хүндийн төлөө өрсөлдөх болно. Баг болгоныг нэг супер од толгойлж байгаа.
Япон: Азийн шилдэг холимог тулаанч Юшин Оками.
Австрали: Холимог тулааны UFC холбооны дунд жингийн аварга асан Роберт Уиттакер.
Филиппин: Мэргэжлийн боксын цорын ганц найман жингийн дэлхийн аварга, дэлхийн спортын домог Мэнни Пакьяо.
Тайланд: Тай боксын дэлхийн аварга Superbon.
Монгол: Улсын арслан Б.Орхонбаяр.
Турк: Үндэсний тосон бөхийн 4 удаагийн аварга Режеп Кара.
Индонез: Бодибилдингийн “Алуурчин” хочит Ай Игедз.
БНСУ: UFC холбоонд ялалт байгуулсан анхны солонгос тулаанч, “Ston Gun” хочит Ким Дон Хён.
Шоунд оролцох Монгол, БНСУ-ын тамирчдыг бид танилцуулсан. Энэ удаад Японы багийг танилцуулж байна.
Багийн ахлагч Юүшин Оками
UFC, Pride, Pancrase, M-1 Global, WSOF, ONE Championship холбоонд тулалдаж байсан холимог тулаанч. Одоо Shooto холбооны дунд жингийн аварга. Thunder хочтой. 44 настай. Өмнө нь жүдо, жиүжицүгээр хичээллэж байсан. Дунд сургуульд байхдаа хөнгөн атлетик, гүйлтээр хичээллэж байсан тул маш шалмаг, хурдан. Холимог тулаанаар ази тамирчид хэзээ ч ялахгүй гэгдэж байсан дунд жинд тун сайн өрсөлдөж, алдарт Андерсон Силваг ялж байлаа. 188 см өндөр, 77 кг жинтэй. Newsweek сэтгүүлээс 2019 онд гаргасан “Таны хүндэлдэг япон хүн” чансаанд багтсан. Асахи телевизээс Бразилд хийсэн “Таны мэддэг япон хүн” жагсаалтын 8-д орж байлаа. Нийт 53 тулалдаж, 38 ялсан.
Ёшио Итои
Мэргэжлийн бейсболчин байсан. 2022 онд зодог тайлсан. Японы бейсболын шигшээ багийн гол тоглогчдын нэг байсан. 44 настай. Аав нь триатлон, ээж нь волейболын тамирчин байсан. Японы “Physical: 100” уралдааны ялагч. Маш олон төрлийн спортын шилдэг тамирчдыг тэсвэр хатуужлаараа давж гарсан. Энэ удаагийн шоуны гол баатар болох магадлалтай. 188 см өндөр, 99 кг жинтэй. Superman гэсэн хочтой. 700 мянган дагагчтай юүтүүбчин.
Кацүми Накамүра
Усанд сэлэлтийн тамирчин. 31 настай. 100 метрийн чөлөөт сэлэлтээр 47 секунд хурдалсан анхны япон тамирчин. Рио де Жанейро, Токио олимпод оролцсон. 2018 оны Азийн наадмын аварга, Зүүн Азийн наадамд 2, Азийн АШТ-д нэг удаа түрүүлсэн. ДАШТ-ий хүрэл медальтай. Эхнэр нь дуучин, жүжигчин Кавашима Үмика. 183 см өндөр, 75 кг жинтэй. Маш үнэрч, үнэртэй ус, лаа цуглуулах хоббитой. Японы усан спортын төрлийн хэд хэдэн рекорд амжилтыг эзэмшдэг.
Соичи Хашимото
Энэ хүнийг мэдэхгүй хүн байхгүй биз ээ. Олимпын хүрэл медальт, дэлхийн аварга жүдоч. Их Дуулга, Гран При тэмцээний 17 медальтай. Үүнээс арав нь алтан медаль. 73 кг жинд барилддаг. 170 см өндөр. Алдарт Ооно Шёохэй аваргатай 4 барилдаж, 2 ялсан. 34 настай. Дэлхийн чансааны 5-д жагсаж байна. Өнгөрсөн жил ДАШТ-ээс хүрэл медаль авч, япон жүдочдоос дэлхийн медаль авсан хамгийн ахмад тамирчны амжилт тогтоосон. 2020 онд дэлхийн чансааг тэргүүлж байсан ч Японы жүдо бөхийн холбоо түүнийг Токио олимпын шигшээ багт сонгоогүйд одоо болтол харамсаж явдаг. Үүрэх, тонгорох дархан мэхтэй. Японы багийн гол зэвсэг нь болно.
Нонока Озаки
Чөлөөт бөхийн дэлхийн хошой аварга, олимпын хүрэл медальт, Азийн хошой аварга. 2018 оны залуучуудын олимпын аварга. 22 настай. 62, 68 кг жинд барилддаг, 164 см өндөр. Түүнтэй барилдахаас өрсөлдөгч нар нь ч халгадаг. Хип хоп бүжиг, теннисээр хичээллэж байгаад чөлөөт бөхөд орсон. Домогт Саори Ёшидаг шүтэн биширдэг. Маш хурдан хөлд ордог дархан мэхтэй. Өсвөр, залуучууд, насанд хүрэгчид гээд бүх насны дэлхийн аварга. Маш чадалтай. “Physical: Asia” шоуны гол оддын нэг.
Кана Ватанабэ
Холимог тулаанч. 37 настай. “Judo Beauty Beast”, “Жүдо бөхийн мангас” хочтой. 63 кг жинтэй, 168 см өндөр. Жүдо бөхөр хичээллэж байсан. Хөмрөх дархан мэхтэй. 7 настайгаасаа жүдо бөхөөр хичээллэж, Азийн залуучуудын аварга болж байсан. 2016 онд дасгалжуулагчийн ажилд шилжсэн ч гуравхан сар ажиллаад гарч, холимог тулааны “FIGHTER'SFLOW” багт элссэн. Холимог тулааны RIZIN, Bellator гэсэн том холбоонд тулалдаж байсан. Нийт 18 тулалдсанаас 13 ялж, нэг тэнцэн, 4 ялагдсан. Гадаадад түүнийг “Японы царайлаг тулаанч” гэж нэрлэдэг.
