“17” продакшны найм дахь уран бүтээл болох “ШАЛЗ” уран сайхны кино үзэгчдэд хүрэхэд бэлэн болжээ. Тулаант, адал явдалт төрлийн тус киноны зураг авалт өнгөрсөн оны 9-12 дугаар сард үргэлжилсэн билээ.
Найруулагч, жүжигчин Б.Амарсайханы найруулан гол дүрд нь тоглосон бөгөөд нээлт аравдугаар сарын 10-нд болно.
Ташрамд дурдахад, “Тавилан”, “Удирдагч”, “Уулын хөх сүүдэр”, “Боолын гэрээ”, “Цасан охин”, “Бодлын хулгайч”, “Аравт”, “Үргээлэг”, “Үргээлэг-2”, “Итгэл”, “Mongolian connection”, “Under the turquoise sky”, “Хохирогч”, “Эргэж ирэхгүй намар”, “Монгол”, “Орлон тоглогч” гээд түүний тоглосон, найруулсан уран бүтээлүүд бүгд л үзэгч, шүүмжлэгчдээс өндөр үнэлгээ авдаг.
Б.Амарсайхан сүүлийн гурван жилийн хугацаанд гэхэд л “Хохирогч” олон ангит киногоороо үзэгчдийг дэлгэцийн өмнө “уясан” бол “Эргэж ирэхгүй намар”-аараа “Оскар”-ын наадамд эх орноо төлөөлөн оролцсон. Мөн “Монгол” уран сайхны киногоо үзэгчдэд хүргэж, өнгөрсөн жил “Орлон тоглогч” олон ангит киног олны хүртээл болгосон юм.
