Хөлбөмбөгийн ДАШТ эхлэхэд сар хүрэхгүй хугцаа үлдэж, оролоцгч багууд бүрэлдэхүүнээ ээлж дараалан зарласаар байна. Зарим багийн мэдүүлэг спорт сонирхогчдын гайхлыг төрүүлж, улс орныг талцуулахдаа хүрээд байгаа билээ. ДАШТ-ийг өнжих одод гэмтэл бэртлээс гадна дасгалжуулагчийн ивээлд багтсангүй. Ингээд шигшээ багтаа багтаагүй оддын жагсаалтыг танилцуулья.
1-р байр, Филип Фоден, Англи
Премьер лигийн 2023/2024 улирлын шилдэг тоглогч Фоден ДАШТ-ий шигшээ багт дуудагдсангүй. 2020 онд анх дуудагдсанаасаа хойш байнга тоглож, 49 тоглолтод оролцож, 4 гоол хийгээд байсан юм. 2022 оны ДАШТ, хоёр Евро тэмцээнд оролцсон. Энэ улирал тэрээр хоёр удаа гэмтэж, “Манчестер Сити” багийн үндсэн багаас хасагдсан. Гэхдээ 49 тоглоод 10+7 үзүүлэлттэй. Ерөнхий дасгалжуулагч Томас Тухель түүнийг сонгоогүй шалтгаанаа 10 байрлалд хэт олон тоглогч байгаа учраас гэж тайлбарласан.
2-р байр, Коул Палмер, Англи
Палмер шигшээд багтаагүй нь олон хүний гайхлыг төрүүлсэн. Энэ хавар тэрээр нөхөрсөг тоглолтуудад гарч байсан ч Тухель түүнийг дуудсангүй. Коул шигшээ багт 2023 оноос хойш тоглож, 14 тоглолтод гарч, хоёр гоолтой. Евро-2024 тэмцээний финалд Испанид гоол оруулсан гавьяатай. Гэвч Премьер лигт 33 тоглохдоо дөнгөж 10+3 үзүүлэлттэй, таван удаа гэмтсэн гэдэг нь Тухелийн шийдвэрт нөлөөлсөн нь ойлгомжтой. “Тэр тоглолтын хувь заяанд хуучин шигээ нөлөөлж чадахгүй байсан” гэж Тухель хэлсэн.
3-р байр, Жоао Педро, Бразил
Жоао Педро ДАШТ-ий шигээ багт сонгогдоогүй нь ёстой гэнэтийн зүйл байлаа. 24 настай Жоао 2023 оны 11 дүгээр сард үндсэн шигшээд дуудагдаж, 8 тоглолтод гарсан. Яг одоо хамгийн сайн формтой байгаа тоглогч. Энэ улирлын “Челси” багийн шилдэг тоглогч нь тэр байлаа. Премьер лигийн 49 тоглолтод 20+9 гэсэн бахархам амжилттай. Харин Карло Анчелотти түүнийг биш Неймарыг сонголоо.
4-р байр, Трент Александер-Арнольд, Англи
Александер-Арнольд 2018 оноос хойш шигшээ багийн байнгын гишүүн, 34 тоглолтод 4 гоол хийсэн. 2018, 2022 оны ДАШТ, Евро-2024-т оролцсон. Харин хамгаалалтад сайн биш байгаа нь Тухельд нөлөөлсөн байх. Испанийн “Реал”-д шилжээд үнэнийг хэлэхэд олигтой тоглоогүй. Хэд хэдэн удаа гэмтэж, 30 тоглолтоос 5 дамжуулалттай.
5-р байр, Харри Магуайр, Англи
33 настай түүний хувьд сүүлийн ДАШТ нь байх ёстой байлаа. Харри 2017 оноос хойш шигшээд хүчин зүтгэж, 66 тоглолтод 7 гоол оруулсан. Хоёр ДАШТ, нэг Еврод багтайгаа орсон. Өнгөрсөн гуравдугаар сард л шигшээд дуудагдаж байсан тоглогч.
6-р байр, Антони, Бразил
Испанийн “Бетис” багт энэ улирал 14 гоол, 10 дамжуулалтаар багаа Аваргуудын лигт хөтөлсөн. 2023 оноос хойш шигшээд дуудагдаагүй байсан ч Карло түүнийг энэ жил эргүүлэн авчирсан юм. Антониг баруун жигүүрт ОХУ-ын “Зенит” багийн Луис Энрикегээс сул гэж үзсэн нь гайхалтай.
7-р байр, Сердар Азмун, Иран
Саяхан Ираны шигшээг Азмунгүйгээр төсөөлөхөд бэрх байлаа. Азмун шигшээдээ 91 тоглож, 57 гоол хийсэн. 2018, 2022 оны ДАШТ-д оролцсон. Түүнийг дуудаагүйд улс төрийн шалтгаан ч бий. Арабын Эмиратын Ерөнхий сайдтай хоёр улсын сөргөлдөөний үеэр зураг авахуулсан нь Ираны дарга нарт таалагдаагүй. АНЭУ-ын лигт ч сайн тоглоогүй, 15 тоглолтод 3+2 үзүүлэлттэй.
8-р байр, Дани Карвахаль, Испани
Мадридын Реал багаас нэг ч тамирчин сонгогдоогүй. Тэдний дундаас 34 настай Дани дуудагдаагүй нь гайхалтай. 2018, 2022 оны ДАШТ, Евро-2024-т оролцсон. 2014 оноос хойш шигшээ багт 52 тоглож, нэг гоолтой. Энэ улирал Карвахаль гурван удаа гэмтэж, ганц оновчтой дамжуулалт өгсөн амжилттай.
9-р байр, Дин Хёйсен, Испани
Нидерландаас булааж авсан Хёйсен ч уригдсангүй. 21 настай төвийн хамгаалагчийн хувьд энэ улирал тун тааруухан байсныг хүлээн зөвшөөрөх хэрэгтэй. 40 тоглож, 2 гоол, 2 дамжуулалттай.
10-р байр, Эдуарду Камавинга, Франц
Камавинга “Реал” багт энэ улирал сайн тоглоогүй. Аваргуудын лигийн “Бавари”-тай хийсэн тоглолтод талбайгаас хөөгдсөн. 23 настай ч тэрээр шигшээдээ 29 тоглоод амжсан байлаа. 2020 оноос хойш тогтмол дуудагдаж байсан ч 2026 онд чадсангүй.
11-р байр, Кингсли Коман, Франц
Коман 2015 оноос хойш шигшээ багт байгаа ч 2018 оны ялгуусан дэлхийн аваргад оролцож чадаагүй. 2022 оны ДАШТ-ээс гадна гурван Еврод өрсөлдсөн. Шигшээдээ 61 тоглож, найман гоолтой. 2025 онд Саудын Арабын багт шилжсэн нь шигшээ багийн боломжийг нь үгүй хийсэн.
12-р байр, Ришарлисон, Бразил
Ришарлисон Бразилын багийн гол довтлогч гэж олон хүн бодож байлаа. 2022 оны ДАШТ-д тэр 4 тоглолтод 3 гоол хийж байсан. 2018 оноос хойш шигшээдээ 54 тоглохдоо 24 гоолтой сайхан амжилттай. Гэвч энэ жил “Тоттенхэм” баг нь тун тааруухан тоглосон билээ.
13-р байр, Уилфрид Заха, Кот-д’Ивуар
Английн шигшээд татгалзаж байсан Заха Кот-д’Ивуарын шигшээд 2017 оноос хойш 34 тоглосон. Нийт дөрвөн Африкийн цомд оролцсон ч дасгалжуулагч Эмерс Фаэ түүнийг тоосонгүй.
14-р байр, Эмиль Форсберг, Швед
Форсберг 2014 оноос хойш шигшээдээ тогтмол тоглож, 92 тоглон, 21 гоол оруулсан. Өнгөрсөн намар түүнийг АНУ-ын лигээс дуудан авчирч байсан бол энэ хавар огт дуудсангүй.
15-р байр, Ирвин Лосано, Мексик
Мексикийн сүүлийн 10 жилийн хурц од. 2016 оноос шигшээд багтаж, 75 тоглоод амжсан. Гэвч түүний нэр өргөтгөсөн бүрэлдэхүүний 55 тоглогч дунд ч байсангүй. Ирвин 2025 оны нэгдүгээр сард МЛС лигийн “Сан-Диего” багт шилжсэн. Гэхдээ дасгалжуулагчтайгаа муудалцаад хасагдсан.
16-р байр, Морган Гиббс-Уайт, Англи
Гиббс-Уайт бол Английн шилдгүүдийн нэг. Гэвч Тухель түүний төвийн хамгаалалтад өөр илүү тамирчин бий гэж үзсэн.
17-р байр, Люка Шевалье, Франц
Шевалье өнгөрсөн жил Францын шилдэг хаалгач болж, 40 сая еврогоор ПСЖ багт ирж байлаа. Гэвч тэр орос хаалгач Матвей Сафоновт ялагдаад сэлгээнд суусан. Сонгоогүй нь ойлгомжтой.
