Дэлхийн томоохон хотуудын амьдрах орчин, соёл, дэд бүтцийг үнэлдэг Time Out сэтгүүл 2026 оны судалгааныхаа дүнг танилцуулж, Seoul хотыг дэлхийн хамгийн явган хүнд ээлтэй хотоор нэрлэлээ.
Судалгаанд оролцсон оршин суугчдын 93 хувь нь хотынхоо явган зорчих нөхцөлийг эерэгээр үнэлсэн бөгөөд энэ үзүүлэлтээр Сөүл бусад хотуудыг багахан зөрүүгээр тэргүүлжээ. Хоёрдугаар байрт Эдинбург орсон бөгөөд хоёр хотын онооны ялгаа ердөө 0.08 хувь байжээ.
Сөүл хот зөвхөн явган зорчих орчноороо бус, Time Out-ын дэлхийн шилдэг хотуудын ерөнхий жагсаалтын эхний 10-т анх удаа багтсан нь онцлох үйл явдал болжээ.
Хотын хэмжээнд нийт 2,788 км урт явган хүний зам бий. Үүнээс гадна автомашины дэд бүтцийг иргэдэд зориулсан ногоон орон зай болгон хувиргасан бүтээлч төслүүд Сөүлийн нэр хүндийг өсгөсөн байна.
Тэдгээрийн хамгийн алдартай жишээ нь Seoullo 7017 юм. Хуучин хурдны замын байгууламжийг дахин ашиглаж, өндөрт байрлах цэцэрлэгт хүрээлэн болон явган хүний зам болгон өөрчилсөн энэ төсөл нь хотын шинэ бэлгэ тэмдэг болжээ.
Сүүлийн жилүүдэд хотуудын чансааг зөвхөн эдийн засаг, өндөр барилга байгууламжаар бус, иргэд өдөр тутмын амьдралдаа хэрхэн явж, амарч, нийгмийн амьдралд оролцож байгаагаар нь үнэлэх болсон.
Явган зорчиход таатай хотууд нь:
Агаарын бохирдлыг бууруулах,
Иргэдийн биеийн идэвхийг нэмэгдүүлэх,
Замын түгжрэлийг багасгах,
Орон нутгийн бизнесүүдийг дэмжих,
Амьдралын чанарыг сайжруулах зэрэг олон давуу талтай байдаг.
Сөүлийн амжилт нь ирээдүйн хот төлөвлөлт зөвхөн автомашинд бус, хүн төвтэй байх ёстойг дахин харуулсан жишээ болж байна. 🚶♀️🌿
