"Rick and Morty" анимейшн цувралаас сэдэвлэсэн "live-action" буюу кино зураглалт богино трейлерүүд цацагдсан нь үзэгч олныг гайхшруулаад байна. Тус цувралын 5-р бүлгийн 10 анги энэ оны зургаадугаар сараас есдүгээр сарын 5-ны хооронд цацагдсан бөгөөд "Adult Swim" компаниас шинэ бүлэг гарч буйтай холбогдуулан кино зураглалт трейлерүүдийг цацжээ.
Шинэ богино трейлерт Рикийн дүрийг "Back to the Future" гурвалын эрдэмтэн Док буюу жүжигчин Кристофер Ллойд, Мортигийн дүрийг Стивен Кингийн зохиолоос сэдэвлэсэн "It" киноны гол дүрийн жүжигчин Жейдэн Мартелл нар тус тус бүтээжээ. Трейлерүүд цацагдсаны дараагаар олон нийтийн зүгээс уг жүжигчдийн бүрэлдэхүүнийг хэвээр хадгалан бүрэн хэмжээний уран сайхны кино бүтээхийг хүссээр байна.
