1 мин

ДЭМБ: Европын хүн амын тал нь омикроны халдварт өртөх магадлалтай байна

Б.Саруул 2022.01.12

ДЭМБ ирэх 6-8 долоо хоногт Европын хүн амын талаас илүү хувь нь омикрон хувилбараар халдварлаж магадгүй байгаа тул нөхцөл байдал хяналтаас гарахаас өмнө арга хэмжээ авахыг улс орнуудад зөвлөж байна. ДЭМБ-ын Европын бүс нутгийн хариуцсан тэргүүн Ханс Клюге "2022 оны эхний долоо хоногт Европт коронавирусийн 7 сая гаруй тохиолдол бүртгэгдсэн. Энэ нь өмнөх 14 хоногтой харьцуулахад хоёр дахин өссөн үзүүлэлт юм" гэжээ.

Коронавирусын эсрэг вакцин нь хүнд өвчлөл, нас баралтаас урьдчилан сэргийлэхэд үр дүнтэй хэдий ч вакцинжуулалтын түвшин доогуур байгаа Зүүн Европт нөхцөл байдал хүндэрч магадгүй байгаа аж. Тухайлбал, Болгарын иргэдийн дөнгөж 28 хувь нь, Румынд 40.5% хувь нь хоёр тун вакциндаа хамрагджээ.Иймд эрдэмтэд дархлаажуулалтыг эрчимжүүлэхийг уриалж байна. Дани улсад хийсэн судалгаанаас үзэхэд вакцинд хамрагдаагүй хүн халдвар авч, эмнэлэгт хэвтэх магадлал зургаа дахин өндөр байжээ.

Үүнээс гадна халдварлах чадвар өндөр омикрон хувилбарын эсрэг илүү сайн маск зүүхийг зөвлөж байгаа юм. АНУ-ын Өвчний хяналт, урьдчилан сэргийлэх төв иргэдэд N95 эсвэл KN95 маск хэрэглэхийг зөвлөжээ.

Түүнчлэн омикроны халдварыг улирлын томуу шиг эмчлэхгүй байхыг анхааруулж байна.

Эх сурвалж: The New York Times