Цахим орчинд хөгтэй, хөгжилтэй бичлэгүүдээрээ НАГНАЙТАЛ, HOOMIE гэх үгсийг трэнд болгож, урлагт өөрсдийн гэсэн өвөрмөц өнгө төрхийг хэдийнээ бий болгож чадсан ALAGAA&NYAMKA хамтлагийн гишүүдтэй ярилцлаа. Тэдний хэрхэн нэгдэж, өөрсдийн төрхөө хэрхэн бүрдүүлсэн, мөн ирээдүйн зорилгын талаарх сонирхолтой ярилцлагыг та бүхэнд хүргэж байна.
-Ярилцлагын урилга хүлээн авсанд баярлалаа. Гангстер залуучуудаар сүүлийн үеийн сонин сайхан?
- Алагаа: Ажил ихтэй л гүйж байна даа. 2022 онд томоохон зүйлүүдийг төлөвлөчихсөн. Түүнийхээ зах зухаас эхлүүлсэн байна. Мөн цагаан сарын өмнөхөн “HOMIES” нэртэй инээдмийн контентоо үзэгчиддээ хүргэсэн. Контент маань бүх IPTV болон SkyGO, Looktv, Voo-н видео санд байршсан байгаа.
- Та 4 хэзээ, хаана хэрхэн танилцаж байсан бэ? Уран бүтээл хамтдаа хийж эхлэх санаа хэзээ төрөв?
- Алагаа: Нямка бид хоёрын хувьд “Х-ТҮЦ” продакшнд хамтдаа байсан. Мөнхбаяр гээд дүү маань бас байгаа. Анх 2018 онд Аглуу энтертаймент танилцаж байлаа. Түүнээс хойш Аглуу энтертайментд жүжигчнээр ажиллаж байгаад 2020 оны өвөл яг хөл хорионы үеэр нэгдэж контентоо хийж эхэлсэн.
- Дэрмээ: Аглуу энтертаймент харьяалагдаж байгаад тавуулаа нийлээд хамтдаа уран бүтээл хийгээд жил 6 сарын хугацаа өнгөрчээ. Энэ хугацаандаа сошиал контентуудаас гадна “Мах уу, Шөл үү” контент, “Жинхэнэ эрчүүд” ОАК, хамгийн сүүлд “HOMIES” инээдмийн шинэхэн контентоо үзэгчдийн хүртээл болгоод байна.
- Анх контентоо сошиалд цацахдаа үзэгчид хэр хүлээж авна гэж бодож байсан бэ? Анхны бичлэгүүдээ хийхэд асуудлууд их тулгарч байсан уу?
- Нямка: Юу гэж хүлээж авах бол гэж их бодож байсан ч За юу гэж л бодвол бод гээд л зоригтой байсан. Хөл хорионы үеэр машин явахгүй учраас хамгийн хэцүү зүйл алхах л байсан. /инээв/
- Алагаа: Өөрсдийнхөө үзэл бодлыг илэрхийлсэн зүйл хийе үзэгчид хэр хүлээж авах вэ гэдгийг харья гэж бодсон. Бидэнтэй ижил бодолтой хүмүүс хэр их байдаг бол гэж их бодсон. Хөл хорионы үе байсан нь л хамгийн хэцүү байсан. Цуглаад уулзах газар байхгүй. Хөл хориотой үед нэгнийдээ цуглаж болохгүй гээд л хүндрэлтэй асуудал тэр л байлаа.
- Дэрмээ: Бид хэд анх шинээр эхэлж байхдаа сошиал орчинд яаж хүмүүст хүргэх вэ гэж их бодсон. Тэгээд фэйсбүүк хуудас нээхдээ 0-с эхлэх үү эсвэл хандалт сайтай хуудас худалдаж авах уу гэж их удаан ярилцсан. Хүнд хүрэх юм 0 байсан ч хүрдэг гэсэн бодлоор шинэхэн хуудас нээж байлаа. Бид сайн юм хийвэл асуудалгүй гээд л зориглосон. Одоо бид 510,000-уулаа болжээ. Youtube сувгийн хувьд 100 сая хүрсэн. SILVER BUTTON маань тун удахгүй бидний гар дээр ирнэ. Нэмж хэлэхэд анх контентоо хийж байхдаа Нямка маань ганцаараа машинтай байлаа. Одоо бол гурвуулаа тусдаа машинтай болсон байна. /ИНЭЭВ/
- Алагаа Нямка 2-ыг хүмүүс "Авьяаслаг монголчууд" шоугаар нь бас хүмүүс их мэддэг байх. Тэр үеийнхээ тухай яриач?
- Нямка: Шоуны Монгол дах YOUTUBE сувгийн хамгийн өндөр хандалтыг авч чадсан. Үзэлт нь 9 саяд хүрсэн байна лээ.
-Алагаа: Азийн хэмжээнд хандалт ихдээ 10 үзүүлбэрийн нэгт орчихсон байсан.
- Сошиалд хамгийн өндөр хандалт авсан Гангстерууд контентын санаа яаж төрсөн бэ?
- Нямка: Анх нэгдэж байхдаа тэр санааг гаргачихсан байсан. Гэхдээ яг цаг нь болж өгөөгүй.
- Алагаа: Гангстерууд контентоо яг цацах талаар ярьж байхад Жижгээ Цогтоо, Реппер BigGee нарын Гангстерууд УСК цацагдчихсан. Яг тэр үед нь давхцаад контентоо хийчхээр бусад уран бүтээлчдээ хүндлэхгүй байгаа юм шиг санагдаад түр хойшлуулчихсан.
- Дэрмээ: Урлагийн салбарт этик хамгийн чухал зүйлсийн нэг. Тиймдээ ч түр хойшлуулсан. Гэхдээ л бид Гангстерууд контентоороо “HOMIES” бүрэн хэмжээний кино болгож чадсан. Кино маань бүх IPTV-д орсон байгаа. Гадаадад байгаа хүмүүс маань SkyGO, LookTV, VOO-с үзэх боломжтой шүү.
- Гангстеруудын дүрүүд хувь хүнийхээ зан чанартай төстэй юу? Жишээлбэл бодит амьдрал дээрээ Нямка бүтэлгүй нэгэн үү?
- Нямка: Ялгаатай. Би тийм бүтэлгүй, Дэрмээ маань зэвүүн зальтай нэгэн биш шүү дээ. Контентод бүтээж буй дүр гэж бий. Тэр дүрээрээ олонд танигдах гээд л явж байна даа.
- Алагаа: Манай хоёрыг хүмүүс яг л контентын дүрээр нь хүлээж авч байгаа харагддаг. Нямкаг бодсон юмгүй чигээрээ гар шиг л хүлээж аваад байдаг. Заримдаа хүмүүс танай энэ Дэрмээ жаахан эвгүй юу гэж асуусан тохиолдол ч бий.
- Гангстерууд контентоос гадна та хэд Хатуу тоглоом нэртэй хэд хэдэн лайв хийсэн. Итгэмээргүй шийтгэлүүдийг ч гүйцэтгэж байгаа харагддаг. Түүн дээр хамгийн хатуу нь Нямка хөмсөгөө хуссан. Нямкагийн хөмсөг хэр удаан ургасан бэ?
- Нямка: Хөмсөг маань сарын дотор ургачихсан. Лайвын дараа янз янзын үс, хөмсөг ургуулдаг тос авах уу гэх чатууд их ирсэн. Гэхдээ би аваагүй л дээ, шүлсээ түрхээд л яваад байсан чинь их амархан ургачихсан. Тэр лайваас хойш ажил мэргэжлээсээ хамаараад гурван ч удаа хуссан.
- Алагаа: Хуссаны дараа ургахдаа Нямкагийн хөмсөг их өтгөн ургасан.
- Дэрмээ: Хүний биеийн онцлогоосоо л шалтгаалдаг байх. Хусаад ургаагүй тохиолдол ч их байдаг юм байна лээ. Ярилцлагыг уншиж байгаа залуучууд, хүүхдүүддээ хандаж хэлэхэд дуурайж хийж болохгүй шүү.
- Номукагийн хувьд та 3 тай яг л эрчүүд шиг хатуу тоглож, та хэд ч их явуулж байгаа харагддаг. Зарим хүмүүс дургүйцэж хүлээж авч байгаа тохиолдлууд ч байсан. Хамтлагийн ганц эмэгтэй жүжигчний тухай?
- Алагаа: Манай контентуудын эмэгтэй дүрүүдийг ямар ч өрсөлдөгчгүйгээр л авч байна даа. Хамтлагийн ганц эмэгтэй байна гэдэг нь нэг талаараа давуу талтай ч нөгөөтэйгүүр хэцүү.
- Нямка: Гурван эрэгтэй хүний ар тал байна гэдэг хэцүү. Бид нарт хоол хийж өгөхөөс эхлүүлээд л их зүйлийг амжуулдаг. Хувцас, стилл имидж, нүүр будалт, үс гэзэг гээд л бид хэдийн бүх арын албыг зохицуулдаг. Бид хэд өөрсдөө ч мэдэхгүй байхад Номука маань гомдчихсон л явж байдаг.Хэсэг байж байгаад зүгээр л болчихсон байдаг. Гэхдээ л тэгж их гомдоод байдаггүй дээ. Их эршүүд хүн шүү дээ.
-Дэрмээ: Манай Номука их дайчин, зоригтой. Хатуу тоглоомон дээр гэхэд л бид хэдтэй яг ижилхэн алалцаад л байж байдаг. Эмэгтэй хүн гоо зүй тал дээрээ их анхаарч, түүнийгээ хамгаалж явдаг шүү дээ. Тийм байхад бид нарын хэлсэн шийтгэлийг биелүүлээд нүүрэндээ тирко углана гэдэг чинь хэр баргийн эмэгтэйгээс гарахааргүй зориг. Гэхдээ л бид хэдийн тоглоом заримдаа үнэхээр хэтэрчихээд байдаг тал их бий.
- Оны өмнө Жинхэнэ эрчүүд ОАК-гаа үзэгчдийн хүртээл болгосон энэ удаа бүрэн хэмжээний УСК-ны ард гарсан байна. Ямар ялгаатай байсан бэ?
- Алагаа: Ялгаа гэвэл маш их. Жинхэнэ эрчүүдийн хувьд 32 ангитай, 1400 гаруй сцень авагдсан. Ард нь ажиллаж байгаа баг бүрэлдэхүүний тооноос эхлээд л ялгаатай зүйл их байсан. Жүжигчдээс ч их ур чадвар шаарддаг юм байна лээ. Угаалгын газарт байгаа дүрс гэхэд л нэг өдөрт авагдсан. Кинон дээрээ бол өөр өөр анги дээр гардаг. Тэнд жүжигчин анги бүр дээр зохиолын дагуу сэтгэл зүйтэй байх ёстой. 2-р ангийн угаалгын газрын сцень дээр жаргалтай байхад сүүлийн анги дээр арай өөр сэтгэл зүйтэй байх жишээтэй. Маш их туршлагатай болсон. Жинхэнэ эрчүүд киноныхоо баг бүрэлдэхүүн, тусалж дэмжсэн компаниуддаа баярлалаа гэж хэлэх нь зөв байх. Продюсергүй бол ямар ч сайхан уран бүтээл байгаад үзэгчдийн хүртээл болж чадахгүй. Тиймээс хамтарч ажилласан биднийг дэмжсэн байгууллагуудаа талархсанаа илэрхийлье.
- Жинхэнэ эрчүүд ОАК үзэгчид хэр хүлээж авсан бэ?
- Алагаа: Монголд гарч байгаагүй хэв маягтай кино байсан болохоор үзэгчид эхний 5-7 ангийг гайхаж үзсэн гэж байсан. План, киноны үйл явдал үсрэлттэй шилжилттэй, кино, реалити шоу эсвэл ярилцлагын нэвтрүүлэг ч юм уу яг аль нь гэдэг нь мэдэгдэхгүй өвөрмөц учраас үзэгчдийн нүд их ядарч байна, ойлгож хүлээж авч чадахгүй байна гэх мэт шүүмжүүд байсан. 7-р ангиас хойш үзэгчид киноны хийц үйл явдалд дасаж,их сонирхож үзэж дуусгасан юм байна лээ. Харин одоо бол S2 байгаа юу гэж их асууж байгаа.
- Нямка: Жинхэнэ эрчүүд киногоо үзэж амжаагүй гадаадад сууж байгаа хүмүүс маань SkyGO апп-аа татаад GO Basic, GO Plus багцуудаас идэвхжүүлээд хүлээж авч үзэх боломжтой байгаа шүү. Телевизээр гарах үед реклам их гарч байна гэсэн шүүмжүүд ирж байсан. Одоо бол ямар ч рекламгүйгээр 32 ангиа нэг дор үзэх боломжтой.
- Яагаад контентоо HOMIES гэж нэрлэсэн бэ?
- Дэрмээ: Гангстерууд контент дээр хэлэгддэг тренд үг шүү дээ. Гадуур бид нартай хүмүүс таарахаараа HOMIE л гэж дууддаг болчихсон байна лээ. Тийм болохоор л тэгээд нэрлэчихсэн.
- HOMIES 2-р анги гэж байгаа юу?
- Алагаа: Байгаа. Энэ жил нэлээн хэдэн уран бүтээл гаргах гээд тус тусынх нь зохиол дээр ажиллаж байна. Одоогоор 2 шинэ киноны зохиол руу зэрэг орчихсон явж байна.
- Контент бүрээрээ залуучуудад зөв зүйлийг харуулахыг зорьж буй харагддаг. Homies контентоороо хэлэхийг хүссэн санаа?
- Нямка: HOMIES контентоороо ялгаварлан гадуурхалт, нийгмийн давхарга, үнэнч нөхөрлөл, хайр дурлал, бүх зүйлийг хөнгөхөн харуулахыг зорьсон. Ер нь хүн хүнээрээ байх. Хэн нэгнийг нийгмийн давхарга, хэтэвчний хэмжээ, гадна үзэмж байдлаар нь биш хүний мөн чанарыг хайрлаасай гэсэн санааг илэрхийлэхийг хичээсэн. Аль хэдийнээ үзчихсэн үзэгчид маань их ам сайтай байгаа. Дараагийн ангийн талаар ч асууж байсан.
- Дэрмээ: Тэр үзэгчиддээ хандаж хэлэхэд HOMIES-т дахин шинэ анги байгаа. Мөн үзсэн, үзэх гэж байгаа бүх үзэгчиддээ баярлалаа. Skymedia, SkyGO, Univision, LookTv, Voo-н видео сангаас хүлээн авч үзээрэй.
- Ирээдүйн зорилго. Өөр жанарт хүч үзэх бодол байна уу? Нууц биш бол дараагийн уран бүтээлийнхээ талаар хэлж болох уу?
- Алагаа: Байлгүй яахав. Одоо хийх уран бүтээл маань инээдмийн хошин төрөл жанраас өөр байгаа. Дараагийн уран бүтээлийн хувьд тодорхой хэлж чадахгүй ч дээр дурдсан шиг хоёр ч кино зохиол руу орчихсон байгаагаа л хэлье дээ / инээв/
- Нямка: Тиймээ өөр төрөл жанрт хүч үзэх бодол их байгаа учраас зориглоод хийж үзэх гэж байна. Арай өөр төвшинд өөрийгөө сорьж үзэх бодол жүжигчин хүн бүрд байдаг.
- Дэрмээ: Өргөн дэлгэцийн уран бүтээлд хүч үзэх бодолтой байгаа. Ямар жанрын уран бүтээл хийх гэж байгаагаа энэ удаадаа нууц үлдээе.
- Залуу дүү нартаа зөв үлгэр дууриалал үзүүлэхийг хичээдэг гэж байна. Та хэдийг хараад жүжигчин болохыг хүсэж байгаа хүүхдүүд байгаа байх. Тэр хүүхдүүдэд өгөх зөвлөгөө.
- Алагаа: Дуртай зүйлээ л хийх нь хамгийн чухал. Чи юу хиймээр байна, ямар зүйл чамайг аз жаргалтай болгож байгаагаа олж мэдэх хэрэгтэй. Дараа нь тэр зүйлийнхээ төлөө хөдөлмөрлөөрэй. Дуртай зүйлээ хий, түүнийхээ төлөө тууштай хөдөлмөрлө.
- Нямка: Тэгж жүжиглэ ингэж жүжиглэ гэж хэлэхээр мундаг хүмүүс биш шүү дээ бид чинь. Би ч өөрөө одоо болтол дүрээ хэрхэн сайн гаргах, үзэгчдэд яаж хүргэх вэ гэдэг дээр суралцаад л явж байдаг. Хааяа бас “сугаа” мэдэрдэг. Гэхдээ жүжигчин болох гэж байгаа хүүхдүүддээ хандаж хэлэхэд шантралгүй тууштай байгаарай л гэж хэлье дээ.
- Дэрмээ: Жүжигчин болох гэж байгаа бол төрөл жанраа тодорхой болгох хэрэгтэй. Хошин урлаг юм уу, театр эсвэл дэлгэцийн урлаг юмуу гээд л төрлөө ч бас тодорхой болгох хэрэгтэй санагддаг даа.
- Ярилцлагын урилга хүлээн авч ирсэнд баярлалаа. Уран бүтээлийн олз омог ихтэй байх болтугай.
