СУДАЛГАА | Чинээлэг, ядуу хүмүүсийн хоорондох нөхөрлөл ядуурлыг бууруулдаг
Хүүхэд санхүүгийн хувьд ямар нөхцөл байдалтай гэр бүлд төрснөөс шалтгаалж ирээдүйн орлого нь тодорхойлогддог болохыг сүүлийн 40 орчим жилд хийгдсэн судалгааны үр дүнгүүд баталсаар байна. Тэгвэл яагаад зарим хүүхэд ядуу гэр бүлд төрсөн ч энэ ангалаас гарч чаддаг, үүнд юу нөлөөлдөг болохыг илрүүлсэн шинэ судалгааны үр дүн Nature сэтгүүлд хэвлэгджээ.
Чинээлэг хүүхдүүдтэй нөхөрлөх боломжтой орчин, хүрээлэлд амьдарч буй ядуу буурай гэр бүлийн хүүхэд ирээдүйд илүү их орлого олж, ядуурлаас гардаг болох нь тус судалгаанаас ажиглагдсан байна. Тодруулбал, найз нөхдийнх нь 70 хувь нь чинээлэг гэр бүлээс гаралтай байвал тухайн хүүхдийн орлого ирээдүйд 20 орчим хувиар нэмэгддэг гэсэн тооцоо гарчээ.
Энэхүү судалгаанд АНУ-ын 25-44 насны 72 сая хүнийг хамруулсан бөгөөд тэдний фэйсбүүк найз, онлайн нөхөрлөлд дүн шинжилгээ хийх замаар уг хамаарлыг гаргаж ирсэн байна.
Нийгмийн давхарга хоорондын нөхөрлөл буюу судлаачдын нэрлэснээр "эдийн засгийн холбоо" нь сургуулийн чанар, гэр бүлийн байдал, ажлын байр, ажлын байран дахь арьс өнгөний ялгаварлан гадуурхалт зэрэг бусад хүчин зүйлээс илүү нөлөөтэй байжээ.
Эх сурвалж: The New York Times