1 мин

Сансраас эрчим хүч түгээж болох эсэхийг судална

Ub.life 2022.11.22

Европын сансрын агентлаг сансраас нарны эрчим хүч хураан дэлхийд нийлүүлэх боломжтой эсэхийг судлах гурван жилийн судалгааг батлах талаар хэлэлцэх гэж байна. “Solaris” хэмээх уг санаачилгыг манлайлан ажиллаж байгаа эрдэмтэн Санжай Вихиендран “Сансраас нарны эрчим хүч нийлүүлнэ гэдэг шинжлэх ухааны уран зөгнөл байхаа больсон. Боломж бий. Гэхдээ сансарт станцаа барьж эхлэхээс өмнө технологийг нь хэрхэн шийдэхээ сайтар бодолцох хэрэгтэй” гэжээ. Гишүүн орнууд зөвшөөрч, санхүүжилтийг нь түргэн шийдвэл ирэх 10 жилд хэрэгжүүлэх боломжтой гэж тэрбээр тооцоолж буй. 

Төдий хол зайд утас татах боломжгүй учраас богино долгионы цацрагаар дамжуулах шаардлагатай аж. “Solaris”-ийн багийн инженерүүд өнгөрсөн есдүгээр сард Мюнхений “Airbus” компанийн байранд хоёр кВт эрчим хүчийг 30 метрийн зайд богино долгионоор цацаж туршсан нь амжилттай болжээ. 

Хүлэмжийн хийн ялгарлыг тэглэж, дэлхийн дулаарлыг удаашруулах шаардлагатай буй энэ үед энэ санаачилга ажил хэрэг болбол дэлхий дахинд ихээхэн өгөөжтэй дэвшил болох билээ. Энэ нь хэдийгээр сүүлийн 50 гаруй жил яригдаж байгаа санаа боловч өнөөг хүртэл бүтээхэд дэндүү төвөгтэй, зардалтай байсан юм. 

Ub.life 2022.11.22