1 мин

Зүүнбаян-Хангийн төмөр зам өнөөдөр ашиглалтад орлоо

Б.Энхцэцэг 2022.11.25 1

2

Монгол Улсын экспорт, импортын шинэ гарц болох Зүүнбаян-Ханги чиглэлийн 226.9 километр төмөр зам өнөөдөр ашиглалтад орлоо. 

Ернхий сайд Л.Оюун-Эрдэнэ өнгөрсөн гуравдугаар сард тус төмөр замыг богино хугацаанд ашиглалтад оруулах үүрэг өгснөөр бүтээн байгуулалтыг төр, хувийн хэвшлийн түншлэлээр найман сарын хугацаанд ашиглалтад оруулж, төмөр замын тээврийг эхлүүлэхэд бэлэн боллоо.

Зүүнбаян-Ханги чиглэлийн төмөр замыг ашиглалтад оруулснаар Замын-Үүд-Эрээний төмөр замын боомтыг 1956 онд байгуулснаас хойш 66 жилийн дараа экспортын гол зах зээл БНХАУ руу төмөр замын хоёр дахь том гарцтай болж байгаа юм. Энэхүү төмөр зам нь Монгол Улсын анхны гурвалсан төмөр замын уулзвар болж байгаагаараа онцлог. Тус төмөр зам нь 1520 мм царигтай, 25 тонн голын даацтай, буталмал чулуун чигжээстэй, төмөр бетон дэртэй, 3-р зэрэглэлийн дохиолол, төвлөрүүлэлт,хориглолтын системтэй зам юм.

Зүүнбаян-Ханги чиглэлийн 226.9 км төмөр замыг ашиглалтад оруулснаар импорт, экспортын бараа бүтээгдэхүүний нэвтрэх хүчин чадал 20 сая тонноор, төмөр замаар тээвэрлэж байгаа нийт тээврийн хэмжээ 65 хувиар нэмэгдэнэ. Мөн дэлхийн зах зээлд хүрэх тэвэр 242 км-оор богиносч, тээврийн өртөг, хугацаа хэмнэнэ. 

Төмөр замын бүтээн байгуулалтын ажилд 180 аж ахуйн нэгж, 3500 гаруй ажилчид оролцож, байнгын 1300 гаруй ажлын байр шинээр бий болжээ. Төмөр замыг төр хувийн хэвшлийн түншлэлийн хүрээнд "Монголиан транс лайн" ХХК болон "Монголиан транс ложистик" ХХК-ийн нэгдэл хийж гүйцэтгэжээ.

Б.Энхцэцэг 2022.11.25

2