Францчууд тэтгэвэр тогтоолгох насыг нэмэгдүүлснийг эсэргүүцэн жагслаа
Тэтгэвэр тогтоолгох насыг нэмэгдүүлснийг эсэргүүцэн өчигдөр Парис, Марсель, Тулуз, Ницца зэрэг томоохон хотын хоёр сая орчим иргэн жагсав. Улсдаа хамгийн томд тооцогдох үйлдвэрчний найман эвлэл уг жагсаалд оролцжээ. Засгийн газар нь тэтгэврийн сан алдагдалтай буйг шийдэхийн тулд тэтгэвэр тогтоолгох насыг 62-оос 64 болгож нэмэгдүүлэхээр төлөвлөсөн нь ийн жагсах шалтгаан болжээ.
Францын томоохон хотуудын бага, дунд сургуулийн багш нарын 40 хувь нь ажилдаа ирээгүй талаар тус улсын Боловсролын яам мэдээлэв. Жагсаалтай холбоотойгоор нийтийн тээврийн сүлжээ нь зарим хотод хэсэгчлэн болон бүрэн зогсжээ.
ОХУ-Украины дайнаас үүдэн Европ даяар эрчим хүч, хүнсний хомсдол үүссэн энэ үед тэтгэвэр тогтоолгох насыг ийн нэмэгдүүлж байгааг эрс эсэргүүцэж байна, энэ сарын 31-нд буюу ирэх мягмар гарагт дахин жагсана гэж үйлдвэрчний эвлэлүүд нь мэдэгдэв.
Франц 2018 онд ДНБ-ийхээ 14 хувийг тэтгэвэрт зарцуулсан нь дэлхийн дунджаас хавьгүй өндөр үзүүлэлт хэмээн Эдийн Засгийн Хамтын Ажиллагаа, Хөгжлийн Байгууллага (OECD) онцолсон буй. Францын Засгийн газрын хэвлэлийн төлөөлөгч Оливье Веран “Манай тэтгэврийн тогтолцоо Европтоо хамгийн энэрэнгүй, боловсронгуй нь. Энэ шинэчлэлийн дараа ч францчууд маань Евробүсийн ихэнх улсын иргэдээс эрт, илүү сайн нөхцөлтэйгөөр тэтгэврээ тогтоолгоно” гэжээ. Европын хэд хэдэн улсад тэтгэвэр тогтоолгох насыг бүр 67 хүртэл өсгөхөөр ярьж байгаа юм.
Эх сурвалж: CNN, The Sun