1 мин

"Microsoft" корпорац "OpenAI"-д томоохон хөрөнгө оруулалт хийхээ зарлав

Ub.life 2023.01.25

Өнгөрсөн даваа гарагт “Microsoft” корпорац олон тэрбум ам.долларын хөрөнгө оруулалтыг “ChatGBT”-г эзэмшигч "OpenAI" компанид оруулж байгаагаа зарлалаа. “Microsoft” яг хэдий хэмжээний хөрөнгө оруулалт хийснээ мэдэгдэхээс татгалзсан ч энэ сарын эхээр тус корпорац 10 тэрбум ам.долларын хөрөнгө оруулалт хийхээр ярилцаж байсныг “Semafor” мэдээлжээ.

Энэхүү гэрээ нь тус хоёр компанийн гурав дахь удаагийн түншлэл бөгөөд өмнө нь 2019, 2021 онуудад “Microsoft” корпорац мөн хөрөнгө оруулж байсан. “Microsoft”-ийн зүгээс энэ удаагийн түншлэл нь хиймэл оюун ухаан дахь ололт, амжилтыг хурдасгаж, ирээдүйд дэвшилтэт технологиудыг арилжаалахад тусална гэжээ.

“ChatGBT” нь хиймэл оюун ухаанд суурилсан автоматаар текст боловсруулах програм бөгөөд Цахиурын хөндийн чатботуудаас илүү дэвшилтэт, бүтээлч гэдгээрээ олны анхаарлыг татаад буй. Өнгөрсөн арваннэгдүгээр сард нээлтээ хийсэн даруйдаа сенсац дэгдээсэн энэхүү чатботын эзэмшигч “OpenAI” компанийн үнэлгээ 29 тэрбум ам.долларт хүрчээ.

Дээрх технологи “Google” компанийн удирдлагуудын анхаарлыг ч мөн татсан байна. Тэд хиймэл оюун ухааны асуудал дээр хэт яарвал “Google”-ийн нэр хүнд унана гэжээ.

“OpenAI” нь “Microsoft” корпорацын үүлэн тооцоолуурын “Azure”-тай хамтран ажилладаг. “Microsoft” корпорацын зүгээс 2019 онд өгсөн нэг тэрбум ам.долларын тусламж нь тэднийг онцгой түнш болгосон юм. Өнгөрсөн даваа гарагт тэдний зүгээс “Azure”, үргэлжлүүлэн “OpenAI” компанийг онцгойлон дэмжинэ гэдгээ илэрхийлжээ.

Эх сурвалж: CNBC

Ub.life 2023.01.25