Энэ оны Оскарын шагнал гардуулах ёслолоос "Everything Everywhere All At Once" киноны дүрээрээ "Шилдэг эмэгтэй жүжигчин" шагнал хүртэн, уг шагналыг хүртсэн анхны Ази гаралтай жүжигчин болон дэлхий нийтийн хайр хүндэтгэлийг хүлээсэн Малайзын жүжигчин Мишель Йео хуримаа хийжээ.
60 настай жүжигчин эмэгтэй 2004 оноос хойш буюу 19 жилийн турш үерхсэн 77 настай "Ferrari" компаний гүйцэтгэх захирал асан Жан Тоддтой Женевт даруухан хуримын ёслол хийсэн талаар "Dailymail" мэдээллээ.
Тэд анх 2004 онд Шанхай хотод болсон тэмцээний үеэр танилцан, 2005 онд сүй тавьжээ. Жан Тодд нь Францын автомашины уралдааны тамирчин асан, "Scuderia Ferrari" болон FIA-ийн ерөнхийлөгч нэгэн юм. Мишель Йео өмнө нь нэгэн ярилцлагадаа "Тэр хэдэн жил хамт байснаа бус хэдэн өдөр хамт байснаа тоолдог" гэж байв. Тэгвэл хос хоёр 19 жил буюу нийт 6992 өдрийг хамт өнгөрүүлсний дараа хуримаа хийжээ.
Тэд Франц, Малайз, Хонгконг, Швейцар зэрэг олон улсад гэртэй ч жилийн ихэнх хугацааг аялан өнгөрөөж, өнөөг хүртэл хуримын ёслолоо хийн, гэрлэлтээ баталгаажуулаагүй байв.
Тэд хоёул өмнө нь амьдрал зохиож байсан бөгөөд Жан Тодд өмнөх гэрлэлтээсээ Николас хэмээх хүүтэй бөгөөд Мишель Йеотой тун дотно харилцаатай гэнэ.
Харин жүжигчин Мишель Йео бизнесмен Диксон Пунтай 1988 онд гэрлэж, дөрвөн жилийн дараа хоёр тийш болж байжээ.
Эх сурвалж: Dailymail
