2 мин

Нарциссист хүмүүсийн хэзээ ч өөрчлөгддөггүй 5 шалтгаан

Г.Сүрэн 2023.08.01 4 2 1

Нарциссист буюу өөрийгөө хэт дөвийлгөгч, эго өндөртэй, бусдыг өрөвдөх сэтгэлгүй, амиа хичээгч хүнтэй дотно харилцаатай байх хүний сэтгэл зүйд асар хортой нөлөө үзүүлдэг. Эхэндээ нарциссист хүнийг таньж ялгах хэцүү ч тэдний дэргэд байхад бага багаар та өөртөө итгэх итгэлээ алдаж, ятгалга нөлөөгөөр нь өөрийнхөө дургүй хүн болж, эцэст нь маш их хүч тэнхээгээ барсан байх болно. Америкийн клиник сэтгэл судлаач, доктор Раманигийн судалгаагаар хүмүүсийн 10-15 хувь нь нарциссист байх магадлалтай бөгөөд тэд өөрсдөө л өөрийгөө өөрчлөх гэж хичээж, үр дүнтэй алхмууд хийхгүй бол амьдралынхаа турш огт өөрчлөгддөггүй аж. Тэд яагаад өөрчлөгддөггүй вэ? 

1. Тэр хийсэн үйлдэл, хэлсэн үгээ амархан мартчихдаг

Бусдын сэтгэлд сэв суулгах үг хэлсэн ч түүнийгээ тоохгүй мартчих нь энүүхэнд. Хийсэн үйлдэл, хэлсэн үгэндээ дүгнэлт хийлгүй өөрийгөө л бодож явдаг учраас тэд өөрчлөгддөггүй. Асуудлаас өөрийн бурууг олж харалгүй, юм бүхэнд хохирогч мэт дүр эсгэн, өөрийнх нь асуудал л хамгийн хүнд хэцүү нь мэт аашлан бархирах нь энүүхэнд. 

2. Тэд хүч чадалд хэтэрхий их дуртай

Бусдыг захирч, эзэмшиж, өөрийн төлөө ашиглаж чадахаар хэмжээний хүч чадалтай байх нь нарциссистуудад маш их таалагддаг. Тийм ч учраас нарциссист хүмүүс өнгөц талаасаа эрх мэдэлтэй, өөртөө итгэлтэй, сэтгэл татам санагдах ч үнэн хэрэгтээ ямар сул дорой хүн гэдгээ хүлээн зөвшөөрөхийг ч хүсдэггүй. 

3. Тэд өөрчлөгдөхийг хүсдэггүй

Цаг хугацааны эрхээр бидний хүсэл сонирхол өөрчлөгдөж, амьдралын өөр өөр үеүдийг бид туулдаг. Гэвч нарциссист хүн өөрийн үүсгэсэн тав тухтай орон зайд шигдэхийг илүүд үзэж, өөрийн одоо байгаа хүч чадлыг алдахыг хүсдэггүй. Тэд өөрийнх нь гар дор захирагдаж чадах хүнийг олсон бол улам ихээр түүнийг захирахыг л хүснэ үү гэхээс харилцааныхаа төлөө өөрчлөгдөх сонголт хийх нь бараг л үгүй. 

4. Тэд өөрсдийн алдаагаа хүлээн зөвшөөрөхийг үзэн яддаг

Хүн бүхэн төгс биш. Бид алдаж, алдаанаасаа суралцаж, илүү сайн сайханд тэмүүлэн амьдардаг. Харин нарциссист хүн хэтэрхий их эготой тул алдаа гаргахыг, алдаа гаргачихсанаа хүлээн зөвшөөрч сул дорой гэдгээ мэдрэхийг үзэн яддаг. Сул дорой гэдгээ хүлээн зөвшөөрөх нь өөрчлөгдөж, суралцахын эхлэл болохыг тэд ойлгохгүй ээ. 

5. Нарциссист хүмүүс өөрийг нь "өөхшүүлэгчдээр" хүрээлүүлсэн байдаг 

Хүн нүд цавчих төдий өөрчлөгддөггүй. Эхлээд өөрийгөө хүлээн зөвшөөрч, юунд хүсэж тэмүүлж буйгаа ойлгож, бага багаар хичээл зүтгэл гаргаж байж л өөрчлөгддөг. Харин нарциссист өөрийг нь хэзээ ч засаж залруулахгүй, шүүмжилдэггүй, "атганд нь орсон" хүмүүсээр хүрээлүүлсэн байдаг учраас өөрийн бодит үнэнийг хэзээ ч олж харахгүй. 

Г.Сүрэн 2023.08.01