Эрүүл мэнд хамгийн эрхэм гэдгийг бүгд ойлгож, анхаарал тавьж, өөрийгөө бөөцийлж байгаарай.
1. Манайхны хэлдгээр "Өвчний түүх"-ээ маш сайн мэддэг байх хэрэгтэй. Ямар эм тариа ууж, хэрэглэж байсан, хэзээ эмнэлэгт хэвтэж, ямар өвчин туссан гээд бүх зүйлээ орхигдуулахгүй санадаг байгаарай. Энэ цаашид өөр ямар нэг асуудлаар эмнэлэгт хандахад маш чухал мэдээлэл болдог.
2. Харшилдаг эм тариа, эсвэл юунаас харшилтайгаа сайн мэддэг, мэдэхгүй бол сорил тавиулж мэддэг болох шаардлагатай. Бид тэр болгон анзаардаггүй ч харшил амь насанд хүрэх хүртэл аюул учруулдаг.
3. Эмчид битгий худлаа хэлээрэй. Эрүүл мэндийн байдлын тухай худал хэлэх нь цааш маш олон эрсдэл дагуулах аюултай байдаг. Буруу онош тавигдвал болохгүй эм тариа хэрэглэж, буруу эмчилгээ хийх эрсдэлтэйгээс гадна амь насанд хүртэл аюултай. Бас эмчид хувийн амьдралынхаа тухай хэлэх шаардлага гарвал бүү санаа зов. Архи тамхины хэрэглээ, сэтгэл санааны байдал, дотно харилцааны тухай буруу мэдээлэл өгч болохгүй шүү.
4. Хэрэв ямар нэг өөрчлөлт, асуудал гарч эхэлсэн л бол цаг алдалгүй шинжилгээ өгч, эмнэлэгт үзүүлж хэвших. Магадгүй маш ноцтой зүйлийн эхлэл ч байж мэдэх учир эрүүл мэндийн тал дээр огт цааргалах хэрэггүй. Жишээ нь би эмч дунд ангид байхад л шүдээ үзүүл гэж байсныг анхаараад үзүүлсэн бол одоо шүдний аппараттай хэдэн жил болохгүй л байлаа.
5. Ерөнхий шинжилгээг гэр бүл, найз нөхдөөрөө тогтмол өгч сурах. Ямар ч эрсдэл гарч мэдэх учир ойр дотнын хүмүүсээ уриалж, шинжилгээг 6 сардаа нэг удаа, ядаж жилдээ ганц удаа ч болтугай өгч хэвшээрэй.
6. Дур мэдэн ямар нэг үйлдэл хийхгүй байх. Толгой өвдлөө гээд шууд эм авч уух, хаа нэгтээ өвдөхөд интернетээс харсан аргаараа эмчлэх гэж оролдохгүй байх хэрэгтэй. Ямар нэг зүйл болохоо байсан бол өөрөө дур мэдэж үйлдэл хийхгүй, интернэтээс, ам дамжсан ярианд итгэлгүй яг мэргэжлийн хүнд хандаж байх хэрэгтэй шүү.
7. Мэдрэлийн ядаргаанд орохоос сэргийл. Итгэмээргүй хэдий ч одоо хүүхэд залуусын дунд мэдрэлийн ядаргаа маш их тохиолдож байна. Мэдээж энэ нь хангалттай сайн унтаж амрахгүй, сайн хооллохгүй байж дэлгэц их ширтэж байгаатай холбоотой. Эсвэл хичээл номондоо ухаан жолоогүй, амралтгүй зүтгэснээс болж тархи толгой ихээр өвддөг болно. Тиймээс өөртөө амрах цаг ямагт гарга.
8. Эрүүл зөв хооллолт, дасгал хөдөлгөөн хамгийн чухал. Жимс, ногоо, өөх тос багатай, бас шөлтэй хоол идэх маш чухал шүү. Жингээ хэвийн хэмжээнд байлгаж, эрүүл мэнддээ анхаарахад амьдралын зөв хэвшил хамгийн чухал.
