1 мин

Домогт хөлбөмбөгчин Петр Чех хоккейн "Белфаст Гигант" багт нэгдлээ

У.Чинзориг 2023.11.17

Премьер лигийн домогт хаалгач хөлбөмбөгөө орхисноос хойш хоккейн спортоор хичээллэх болжээ. "Челси" болон "Арсенал" багуудад хаалгачаар тоглож асан Петр Чехийг хоккейн аварга "Белфаст Гигант" баг зээллэгээр эгнээндээ нэгтгэв.

Тэрбээр Премьер лигийн 443 тоглолтод оролцож, 202 тоглолтод хаалгаа цэвэр манасан байдаг. Эл амжилт нь түүнийг бүх цаг үеийн хамгийн олон тоглолтод хаалгаа цэвэр манасан Премьер лигийн хаалгачаар өргөмжилсөн юм. Мөн тэрбээр Премьер лигийн 200 тоглолтод гоол алдаагүй анхны агаад одоогоор цорын ганц хаалгач. Петр Чех 2019 оны хавар хөлбөмбөгийн замналаа өндөрлүүлж, зодог тайлах ёслол үйлдсэн билээ. Үүнээс өмнөхөн Чехийн шигшээ багийн төлөө хамгийн олон тоглолтод оролцсон тамирчнаар тодроод байсан юм.

41 настай Чех 2019 онд Үндэсний хоккейн лигийн 2-р дивизионы "Guildford Phoenix" багт тоглохоор анх гэрээ байгуулсан. Тэрбээр хоккейн анхны тоглолтодоо хоёр торгуулийн цохилтыг хааж, мөн хэд хэдэн чухал хаалт хийснээр шилдэг тоглогчоор шалгарсан юм.

Түүний одоо нэгдээд буй "Белфаст Гигант" баг Их Британийн Элит хоккейн лигийн аваргаар түүхэндээ долоон удаа тодорсон амжилттай ажээ.