2 мин

Гүнж Кейт Миддлтоныг алга болсон хэмээн дэлхий даяар шуугьж байна

О.Анхзаяа 2024.03.04 1

Английн гүнж Кейт өнгөрөгч 2023 оны 12 сарын 25-нд Сандринхам сүм дээр зул сарын залбирлын үеэр олон нийтийн нүдэнд сүүлчийн удаа харагдаж, зургаа даруулсан байдаг. Түүнээс хойш Кейтийн тухай ямар ч зураг гараагүй байгаа бөгөөд хамгийн сүүлд 1 сарын 17-нд түүнийг хэвлийн хөндийн хагалгаанд орох гэж байгаа тухай мэдээлсэн юм. 

Кенсингтон ордноос өгсөн мэдээллээр бол "Уэльсийн гүнжийн хүслээр бид түүний эрүүл мэндийн байдлын тухай мэдээллийг хувийн нууц болгон авч үзэж, олон нийтэд зарлахгүй болохыг мэдээлж байна. Тэрээр хүүхдүүдээ аль болох хэвийн тайван байлгахыг хүсэж байгаа бөгөөд олон нийт үүнийг ойлгоно хэмээн найдаж байна. Мөн 3 сарын 31-нд тохиох Улаан өндөгний баяр хүртэл тэрээр төрийн ажлаа үргэлжлүүлэхгүй байх магадлалтай" хэмээн мэдээлжээ.

Кенсингтон ордны зүгээс Кейтийг 1 сарын 29-нд хагалгаанаасаа буцан гэртээ ирсэн хэмээн мэдэгдсэн. Ханхүү Уилльям мөн 2 сарын 27-нд очих байсан үйл ажиллагаагаа цуцалж, "Хувийн асуудал гарсан" хэмээн мэдэгдсэн байна. 

Ингэснээр интернэтээр янз бүрийн цуу яриа тархаж эхэлсэн юм. Түүний биеийн байдал маш ихээр муудаж, ухаан орохгүй байгаа хэмээн нэг хэсэг үзсэн бол нөгөө нэг хэсэг тэдний гэрлэлт бүтэлгүйтэж, Кейт одоо өөр газар нуугдаж байгаа хэмээв. Харин зарим нь түүнийг амиа алдсан, өөр дүр эсгэгч гарч ирсэн, эсвэл гоо сайхны хагалгаанд орж эдгэрхээ хүлээж байгаа гээд янз бүрийн таамаг дэвшүүлээд байгаа юм.

Мэдээж хэрэг энэ олон таамаглал инээдтэй, итгэмээргүй санагдаж болох ч гол нь бүгд нэг асуудлыг хөндөж байгаа нь "Гүнж хаачсан бэ?" байсан юм.

Мөн түүний мэс засалд орох гэж буй тухай мэдэгдэл үнэндээ хүмүүст хачирхалтай санагдсан тухай хэд хэдэн таамаглал байгаа аж.

Жишээ нь энэхүү мэс заслын дараа 10-14 хоног эдгэрч, эмчлүүлсэн гэсэн ч тэрхүү мэс засал нь жижигт тооцогддог бөгөөд удаан хугацаанд эмчлүүлэх шаардлага гардаггүй байна. Түүнийг өөр төрлийн мэс засалд орсон болов уу хэмээн хүмүүс үзэж байгаа аж. 

Мөн Ханхүү Уилльям эмнэлэгт зочлон очиж буй зургууд тархсан ч гүнж эмнэлэгт байгаа, эмнэлгээс гарсан тухай ямар ч мэдээлэл, зураг олдоогүй байна.

Хүмүүс хааны ордныг ямар нэг зүйл нуухыг оролдож байна хэмээн үзэж байгаа ч тодорхой хариулт одоогоор алга байна. "Британичууд гэнэт хүний хувийн нууцыг хамгаалдаг болсон хэрэг үү? Нэг л зүйл буруу байна" гэх сэтгэгдлүүд одоо ч ар араасаа хөвөрсөөр байна. 

О.Анхзаяа 2024.03.04