“Исламын улс”-ын дайчдын нэгний твиттер хуудсыг Орландогийн халдлагыг эсэргүүцэгч нэгэн хакердаж, ижил хүйснүүдийн далбаа, гей “бахархал”-ын ишлэл, гей порно бичлэгийн холбоос зэргээр “чимсэн” байна. Хакер “WauchulaGhost” хэмээх онлайн нууц нэртэй бөгөөд хэдэн сарын өмнөөс исламын дайчдын Twitter -т “бэлэг барьж” эхэлжээ. Орландогийн гей шөнийн клубт болсон халдлага исламын дайчны хуудсыг солонгын өнгөт далбаагаар “чимэх” шалтгаан болсон аж.
“WauchulaGhost” гэх хаягтай, нэрээ нууцалсан тэрхүү эр “Newsweek”-т өгсөн ярилцлагадаа “Би үүнийг Орландод амиа алдсан залуусын төлөө хийсэн” гэжээ. Тэрбээр АНУ-д амьдардаг гэхээс өөр тодорхой мэдээлэл хэлээгүй бөгөөд “Исламын улс”-ын 200 гаруй дайчны Twitter-ыг мэднэ гэжээ. Мөн тэрбээр “Ebonу”, “Yeti” гэх нууц нэртэй хоёр хакертай хамтран хакердах “кампанит ажил”-аа үргэлжлүүлэх гэнэ.
“Исламын улс” олон нийтийн сүлжээ, тэр дундаа Twitter-ээр үзэл суртлаа хүчтэй нэвтрүүлж, ихэд суртчилдаг билээ. Тиймээс Twitter-ын албаныхан 2015 оноос хойш 125 мянган хаягийг хаасан байна.
Холбоотой мэдээллийг Флоридагийн гей шөнийн клубт 50 хүн буудан хөнөөжээ, Гей клубт халдагч террорист бүлэглэлтэй холбоогүй гэв, Флоридагийн гол буруутны тухай ИЛ БОЛСОН БҮХ МЭДЭЭЛЭЛ, ВИДЕО: Орландогийн хохирогчдын сүүлчийн мөч "Snapchat"-д бичигджээ, ОХУ-д ижил хүйстнүүдийн төлөө жагсвал баривчлагдана зэрэг нийтлэлээс үзнэ үү!
