Монгол Улсын Ерөнхийлөгчийн ивээл дор хэрэгжиж буй “Англи хэлтэй залуус” хөтөлбөрийн хаалтын үйл ажиллагаа өнөө өглөө Сүхбаатарын талбайд болж өндөрлөлөө. Хөтөлбөрт нийт 4500 оюутан залуус хамрагджээ. Гурван долоо хоногийн турш үргэлжилсэн уг сургалтыг гадаад, монголын 50 орчим багш нар удирдсан байна. Хөтөлбөрийн хүрээнд нийгэмд эерэг хандлага түгээх зорилготойгоор залуус өнгөрсөн долоо хоногт туул голын эрэг дагуу 14 км газрын 4 тонн орчим хог хаягдлыг цэвэрлэсэн гэнэ.
Хаалтын үйл ажиллагааны үеэр Ерөнхийлөгчийн Тамгын газрын дарга З.Энхболд “Гадаад хэл нь хүний эх хэлийг мартуулдаг зүйл биш. Харин ч сэтгэхүйн орон зайг тэлдэг зүйл” гэдгийг онцолжээ. Түүнчлэн Ерөнхийлөгч Х.Баттулга хэлэхдээ “Англи хэл дэлхийн хаана ч бусадтай харьцах, ойлголцох гүүр болдог. Тиймээс англи хэл сурах нь залуу хүн бүрийн зорилго, хэрэгцээ байх ёстой” гэлээ.
Бэлтгэсэн: Х.Хулан
