Танд заавал сонсох 4 сонирхолтой подкастыг танилцуулж байна!
1. Design Matters
Автор, брэнд стратегич Дэбби Миллман Design Matters нэвтрүүлгээ 14 дэх жилдээ хөтөлж буй. Дизайны чиглэлийн хамгийн анхны подкаст гэгддэг энэ нэвтрүүлгийн дугаар бүрт бүтээлч салбарын хамгийн нөлөө бүхий график дизайнеруудаас эхлээд кино найруулагч тэргүүтийг урьж ярилцдагаараа онцлогтой. Тэднээс цөөнийг нь л дурдахад Малколм Гладвэлл, Паула Шер, Барбара Кругер гэх мэт алдартнууд орно. Дэббигийн нэвтрүүлгээ олон жил амжилттай явуулсны нэг нууц нь зочныхоо талаар судалж мэдсэн судалгаа, түүнтэй уялдсан гайхалтай асуултууд гэж хэлж болно. Зарим оролцогчид “Та наад мэдээллээ яаж олоо вэ?” гэж асуух нь ч бий.
2. People Fixing the World
“BBC World Service”-ийн салбар подкастуудын нэг тус нэвтрүүлэгт бидэнд тулгардаг бэрхшээлүүдийг өөр нэг хэсэг хүмүүс хэрхэн шийддэг талаар сонирхолтой туршилтуудыг сурвалжилдаг. Тухайлбал “Tech that tricks the brain” дугаарын талаар товч тайлбарлая. Зарим өдрүүдэд бид төвлөрөх шаардлагатай бол заримдаа илүү тайван байх хэрэгцээ үргэлж гардаг. Нэгэн старт-ап компани үүнийг зохицуулахын тулд хуурамч зүрхний цохилттой бугуйвч зохион бүтээжээ. Үүнийг хэрэглэснээр бид стресс, тавгүйрхлээ тодорхой хэмжээнд багасгаж болох юмсанж.
3. Hidden Brain
Далд ухамсар бидний сонголтод нөлөөлж, цаашлаад амьдралыг хөтөлж байдагт та итгэдэг үү? Энэ талаар магадгүй та бодож үзэж амжаагүй ч байж болох юм. Чухамдаа бидний мэддэг атлаа сөхөж харж байгаагүй сонирхолтой зан үйлүүдийн талаар хөтлөгч Шанкар Ведантам шинжлэх ухааны үндэстэй бэлтгэн өгүүлдэг. Тухайлбал, “Bringing up baby” дугаарт нярай хүүхдийн авианууд юуг өгүүлдэг байж болох талаарх сэдвийг хөнддөг бол “Man up: How a fear of appearing feminine in men, and affects us all”-д бидний дунд элбэг тохиолддог сэдэв болох эрчүүд эмэгтэйлэг шинж чанаруудаас өөрсдийгөө хамгаалахад хүргэдэг нийгмийн хэвшмэл зан үйлийн талаар өгүүлнэ.
4. Ted Radio Hour
АНУ-ын NPR-аас (Non-Profit Radio) явуулдаг эл подкастад Ted Talk дээр тавигдсан илтгэлүүдийг сэдэв сэдвээр нь бүлэглэн хүргэдэг. Нэвтрүүлгийн хөтлөгч Гай Раз илтгэгчидтэй тухайн сэдвээр илүү гүнзгий хэрнээ товч тодорхой ярилцаж чаддагт нэвтрүүлгийн чанар нь оршдог.
