"Юнител HUB” төв энэ сарын 9-нд Дархан-Уул аймгийн Гэр бүл, хүүхэд, залуучуудын хөгжлийн газарт нээлтээ хийв. Энэхүү дижитал төвийг "Юнител" группээс бүс нутгийн тоон хуваагдлыг арилгах, боломжийг хүн бүрт тэгш олгох зорилгоор НҮБ-ын Хүн амын сангийн дэмжлэгтэйгээр байгуулаад буй юм. Та бүхэн "Юнител HUB" төвд очсоноор Look tv-ээс кино үзэж, интернэт, суурин компьютер, ухаалаг таблетийг ашиглах боломжтой. Энэ бүх үйлчилгээ насны хязгааргүй бөгөөд үнэ төлбөргүй. Мөн Mplus апплекшнаас цахим ном уншиж, бас сонсож ч болно. Энд бүх төрлийн цахим хичээлүүд үзэх боломжтой Coursera сайт ч үнэгүй хэлбэрээр байршаад буй аж. Таны дижитал хэрэгцээг цогцоор нь шийдсэн тав тухтай орчин, чөлөөт цагаа үр дүнтэй өнгөрүүлэх сонирхолтой орон зайг "Юнител HUB" төвд ийн бүрдүүлжээ.
Тус дижитал төвийн нээлтийн үйл ажиллагаанд Алуунгоо, Сето, Maberrant нар ая дууны мэндчилгээ хүргэсэн бөгөөд таван цаг үргэлжилсэн уг үйл ажиллагаанд хүрэлцэн ирсэн хүмүүс "Зэв" дижитал музей үзэж, VR тоглоомоор өөрийгөө сорин, сонирхолтой тэмцээнүүдэд оролцож цагийг зугаатай өнгөрүүлсэн юм.
Улмаар "Юнител" группээс “Юнител HUB” төвийг Гэр бүл, хүүхэд, залуучуудын газарт бүрэн хүлээлгэж өгөв. Цаашид энэхүү төвийн үйл ажиллагааг өргөжүүлж олон төрлийн сургалтуудыг оруулах сонирхолтой байгаа гэдгийг Засгийн газрын хэрэгжүүлэгч агентлаг Гэр бүл, хүүхэд, залуучуудын хөгжлийн газрын дарга Г.Батдорж нээлтийн үеэр онцоллоо.
