Хятадад 5G технологиор хийсэн алсын зайны мэс засал амжилттай боллоо
Өнгөрсөн баасан гарагт Бээжин хотын анагаах ухааны баг 5G технологийг ашиглан Хятадын баруун хойд нутгийн Шинжаан Уйгар бүсийн гурван өвчтөнд 3000 километрийн холоос нүдний лазер хагалгааг амжилттай хийлээ.
Шинжааны Тумхүк хотын орон нутгийн эмнэлгээс илгээсэн нүдний зургийг хүлээн авсны дараа Бээжингийн Анагаах Ухааны Их Сургуулийн харьяа эмнэлгийн эрхлэгч Чэнь Юшин дээрх гурван өвчтөний мэс заслын хөтөлбөрийг тооцоолон гаргажээ. Тус хөтөлбөрийн мэдээллийг хэрэглээний програмын тусламжтайгаар 5G төхөөрөмж рүү илгээснээр төхөөрөмж автоматаар мэс ажилбарыг гүйцэтгэсэн байна.
“Мэс засал маш амжилттай боллоо. Хятад улс мэргэжлийн нүдний эмчийн дутагдалд орсон ч энэхүү хиймэл оюун ухааныг ашиглан орон нутгийн мэргэжилтнүүд бидний зөвлөмжийн дагуу мэс ажилбар гүйцэтгэх боломжтой боллоо.” /Чэнь/
Энэхүү технологийг өргөн дэлгэрүүлэхийн тулд орон нутаг хооронд судалгааны төвүүдийг байгуулан эмнэлгийн ажилчдад сургалт зохион байгуулах үйл ажиллагааг эрчимтэй явуулж байна гэжээ.
Мэс засал хийлгэсний дараа нүдний үзлэгт хамрагдаж буй өвчтөн.
Эх сурвалж: Xinhua News
Бэлтгэсэн: Б. Уранзаяа