Өмнөд Солонгосын жүжигчин Юн Ё Жон Британийн "ОСКАР" хүртжээ
Өмнөд Солонгосын жүжигчин Юн Ё Жон "Minari" киноны дүрээрээ Их Британийн Оскар хэмээгддэг "British Academy of Film and Television Arts" наадмын Шилдэг туслах эмэгтэй дүрийн шагналын эзэн болжээ. Солонгос жүжигчин тус наадамд тэргүүлж буй нь анхны тохиолдол юм.
Өчигдөр (2021.04.11) Лондон хотод болсон кино наадмын үеэр шагнал гардан авахдаа 73 настай жүжигчин Юн Ё Жон англиар үг хэлсэн нь цахим ертөнцөд дуулиан тариад байна. Тэр шагналын эзнийг зарлахад "Юу гэж хэлэхээ мэдэхгүй нь. Нэр дэвшсэндээ баяртай байна... Өө байзаарай. Би чинь ялсан шүү дээ. Юун түрүүнд, Эдинбургийн гүн таалал төгссөнд харууслаа илэрхийлмээр байна. Энэхүү шагналд гүнээ талархлаа." гэжээ. Юн Ё Жон энэ оны АНУ-ын Оскарын кино наадамд нэр дэвшээд буй.
Тэр мөн "Энэхүү шагнал их утга учиртай. Британичууд надтай их л эвгүй дүрээр танилцсан боловч сайн жүжигчин хэмээн хүлээн авч буйд би маш их баяр талархалтай байна. Надад саналаа өгсөн хүн бүхэнд баярлалаа" гэжээ.
АНУ-ын найруулагч Ли Исаак Чангийн бүтээл "Minari' кино нь энэ оны "Алтан бөмбөрцөг" кино наадмын Шилдэг гадаад хэл дээрх кино төрөлд тэргүүлсэн бөгөөд Оскарын зургаан ч төрөлд нэр дэвшээд байна. Солонгос-америк гаралтай гэр бүл "Америк мөрөөдөл"-д хөтлөгдөн Арканзас руу нүүж буй аяллыг уг кинонд харуулжээ.
Эх сурвалж: NPR