1 мин

Музей, театр, уран зургийн галерейд очдог хүмүүс ИЛҮҮ УРТ насалдаг

Г.Сүрэн 2021.04.21 2

Их Британийн Лондонгийн Их сургуулиас явуулсан судалгаагаар музей, театр, уран зургийн галерейгаар зочлох дуртай хүмүүс урт удаан насалдаг болохыг тогтоожээ. Сардаа хэд хэдэн удаа үзвэр үйлчилгээ үзэж, урлагийн бүтээлтэй танилцдаг хүмүүс эрт нас барах, өвчлөх магадлал энгийн хүмүүсээс 31 хувиар бага байдаг аж. Харин жилдээ нэг хоёр удаа музей, галерейд зочилдог хүмүүсийнх 14 хувиар бага дүнтэй гаржээ.

Сонгодог хөгжим, урлагийн бүтээл, уран зураг үздэг хүмүүс зан төрхийн хувьд аядуу тайван, зөөлөн сэтгэлтэй байдаг бол урлагийн тухай огт сонирхдоггүй хүмүүс уурлаж уцаарлах, сэтгэлийн хямралд өртөх магадлал их байдаг гэж судалгаанд дурджээ. 

Англи улсын 6000 гаруй 50-аас дээш насныханд явуулсан уг судалгаагаар хүний хэр урт наслах нь эрхэлж буй ажил, гэр бүлийн харилцаа болон чөлөөт цагаараа хийдэг зүйлсээс шууд хамааралтай болох нь харагджээ.

Тиймээс урлагтай аль болох ойр байж, гоё сайхан урлагийн бүтээлтэй танилцаж, өөрийгөө хүрээлүүлэх нь хүний сэтгэл санааг өргөж, урт удаан аз жаргалтай амьдрахад нөлөөлдөг болохыг судлаачид зөвлөсөн юм.

Эх сурвалж: Artsy.net

Г.Сүрэн 2021.04.21