1 мин

Өөр гоо үзэсгэлэн: Албинизм

Г.Сүрэн 2021.05.11

Албинизм нь 20 мянган хүн тутам нэг тохиох магадлалтай генетикийн нэн ховор эмгэг юм. Арьс, үс, нүдний өнгийг бүрдүүлэгч меланин гэх будагч бодис биед дутагдсанаас эсвэл огт байхгүйгээс албинизм үүснэ. Албинизм нь латин хэлээр "цагаан" гэх утгатай бөгөөд ийм эмгэгтэй хүмүүс харааны бэрхшээлтэй боловч бие махбод, оюун санааны хувьд эрүүл хүмүүс юм.

Өнөө цагт хүн төрөлхтөн олон төрлийн ялгаатай гадаад төрхийг хүлээн зөвшөөрөх болсон ч албинизм эмгэгтэй хүмүүсийг Ази, Африк тивд ялгаварлан гадуурхаж, гутаан доромжлох явдал оршсоор байна. Хятад улсад л гэхэд албинизмтай хүүхдүүдийг төрөлхийн хараагдсан, "үйлийн үрийн илрэл" хэмээн үзэж, төрөхөөс нь өмнө амийг нь таслах, асрамжийн газар өргүүлэх тохиолдол маш их байдаг аж. Шюели охин тэдний нэг бөгөөд одоогоос 16 жилийн өмнө Хятадад төрсөн ч эцэг эх нь төрмөгц нь орхижээ. Харин гурван настайд нь Голланд гэр бүл өргөн авснаар тэдний гэр бүл Нидерланд руу нүүж, өвөрмөц содон дүр төрхтэй охин 11 настайгаасаа загвар өмсч, улмаар Vogue сэтгүүлийн модель болж, дэлхийн алдартай брэндүүдтэй хамтран ажиллах болжээ. Тэр энэ тухайгаа BBC-д ярилцлага өгч, "Орхигдсондоо огт шархалдаггүй. Харин ч шинэ хувь заяаны эхлэл болсонд талархдаг" хэмээжээ.

Шюелигийн нүд гэрэлд маш эмзэг тул зураг авалтын үеэр ихэвчлэн нүдээ аньдаг гэжээ. "Хүмүүс нэгнээ зүгээр л бусдаас өөр байсанд нь "хараагдсан" хэмээдэг зүй бус ойлголтыг өөрчлөхийг хүсдэг. Албинизмтай хүмүүс ч хайрлаж, хайрлуулахаар энэ амьдралд ирсэн. Хүн бүхэн нэг л хүсэлтэй".