1 мин

95 настай артист Анжела Альварес Грэммийн "Шилдэг шинэ артист" шагналын эзэн боллоо

Г.Сүрэн 2022.12.01

Куба-америк гаралтай дуучин, хөгжимчин Анжела Альварес 95 насандаа Грэммийн Латин дуу хөгжмийн шагнал гардуулах ёслолоос "Шилдэг шинэ артист" шагнал хүртлээ. Тэрээр 90 насандаа дуучны карьераа эхлүүлсэн бөгөөд шагнал гардан авахдаа "Мөрөөдлөө биелүүлэхэд хэзээ ч оройтохгүй" хэмээжээ.

Анжела Альварес ийнхүү Грэммийн Латин дуу хөгжмийн шагнал гардуулах ёслолоос "Шилдэг шинэ артист" шагнал хүртсэн хамгийн өндөр настан болж байна. Тэрээр хөгжимчин, ая зохиогч Силвана Эстрадатай эн тэнцэж шагналаа хамтран хүртжээ.

Анх ач хүү Карлос Альварес нь түүнийг дуугаа бичүүлэхийг зөвлөн, цомог болгон гаргасан нь олны хайр талархлыг хүлээсэн юм. Анжела хэдий багаасаа кубийн уугуул хөгжим тоглон дуулах дуртай байсан ч хүнд хэцүү цаг үе, цагаачийн амьдралаас шалтгаалан урлагт хөл тавилгүй удсан тухай Billboard мэдээлжээ.

Тэрээр шагналаа гардан авахдаа "Би энэ шагналыг Бурханд болон хайрт Куба улсдаа зориулахыг хүсэж байна. Энэ шагналыг хэзээ ч мартахгүй. Амьдрал хэцүү ч мөрөөдлөө биелүүлэхэд хэзээ ч оройтохгүй гэдгийг би ойлголоо. Итгэл хайрын хүчээр та ч бас мөрөөдөлдөө хүрч чадна" гэжээ.