1 мин

Фэйсбүүктэй өрсөлдөхөөр зэхэж буй MeWe платформ юугаараа онцлог вэ?

Б.Саруул 2020.06.10 2 1 1

251

Фэйсбүүк, Твиттер гэх мэт томоохон сошиал платформуудын улс төр, сонгуультай холбоотой цензур, хэрэглэгчдийн нууцыг задруулсан асуудлаас болж зарим хэрэглэгч эдгээр платформоос татгалзах хандлага үүсээд байна. Тэгвэл өөрсдийгөө "Фэйсбүүкийн эсрэг" гэж тодорхойлсон MeWe платформыг хөгжүүлэгчид салбартаа анх удаа нууцлалын эрхийн тухай журмыг хэрэглэгчдэдээ танилцуулжээ. Өөрөөр хэлбэл, MeWe аппликэйшний хэрэглэгчид тус платформын хүрээн дэх өөрийн бүхий л мэдээллийг хянах, эзэмших боломжтой юм байна. Үүнд:

• Тус платформд оруулсан хувийн мэдээлэл, контент цөм хэрэглэгчийн мэдэлд байна. 
• Гуравдагч этгээд хэрэглэгчид рүү зорилтот зар сурталчилгаа явуулах боломжгүй.
• Ньюсфийдээр урсаж байгаа мэдээлэл болон пост ямар дарааллаар гарч ирэхийг хэрэглэгч өөрөө шийднэ. 
• Аппликэйшнийг хөгжүүлэгчид хэрэглэгчийн ньюсфийдийг удирдах, шүүлтүүрдэх, өөрчлөх ямар ч алхам хийхгүй.
• Нууцлал бол хэрэглэгчийн эрх. Тиймээс хэрэглэгч өөрөө бүхний удирдаж, зөвшөөрөл олгоно. 
• Платформыг хөгжүүлэгчид хэрэглэгчийн мэдээллийн гуравдагч этгээдэд худалдахгүй.
• MeWe царай таних технологи ашиглахгүй.
• Хэрэглэгч хүссэн үедээ хаягаа устгаж, бүх контентоо авах эрхтэй гэжээ. 

Дашрамд дурдахад, MeWe платформыг үүсгэн байгуулагч Марк Вайнштайн саяхан TED Talk-т илтгэл тавихдаа одоогийн сошиал медиа платформуудыг "цагдан хяналттай капитализм"-ын бизнес загвар гэж тодорхойлжээ. Мөн MeWe ямар ч нөхцөлд арилжааны болон улс төрийн ашиг сонирхол агуулахгүй хэмээн амлаж байна. Өөрөөр хэлбэл, MeWe-д ямар ч зар сурталчилгаа явуулахгүй, хэрэглэгчийн мэдээллийг маркетер, улстөрчдөд худалдахгүй гэжээ. Түүний мэдээлснээр MeWe одоогоор 8 сая хэрэглэгчтэй байгаа бөгөөд 2020 оны эцэс гэхэд 40 саяд хүргэхээр төлөвлөж байна гэв. 

Эх сурвалж: Forbes

Б.Саруул 2020.06.10

251