Х.Цагаанбаатарт үргэлж ялагддаг байсан домогт аварга Чой Минхо
Өмнөд Солонгосын алдарт жүдоч Чой Минхо их спортын замналдаа Монгол улсын хөдөлмөрийн баатар, гавьяат тамирчин, дэлхийн аваргын алт, хүрэл, олимпийн наадмын хүрэл медальт Х.Цагаанбаатартай дөрвөн удаа таарч барилахдаа нэг ч удаа ялж байгаагүй аж.
Чой Минхо нь 1980 оны наймдугаар сарын 18-нд Өмнөд Солонгосын Кимчонь хотод төржээ. Тэр 2008 оны Бээжингийн олимп, 2003 оны дэлхийн аварга шалгаруулах тэмцээний алтан медальтай. Мөн 2004 оны олимпийн наадам, 2007 оны дэлхийн аваргын хүрэл медальтай дэлхийн шилдэг жүдочдын нэг юм.
Тэрбээр хөдөлмөрийн баатар Х.Цагаанбаатартай хамгийн анх 2004 оны Афины олимпод 1/4 шигшээд учраа таарч ялагдсан бөгөөд тухайн үед хоёулаа хүрэл медалийн тавцанд зогсож байв.
Түүний дараагаар 2007 оны Рио Де Жанейрогийн дэлхийн аварагад мөн 1/4 шигшээд, 2011 Москва грандслам 1/8 шигшээд, 2012 Дюссельдорф грандприкс 1/2 шигшээд учраа таарч тус тус ялагдаж байжээ.
Мөн тэр 2008 оны Бээжингийн олимпод Х.Цагаанбаатар ялагдаж, тэмцээнээ өндөрлүүлэхийг хараад "би олимпийн аварга болчлоо" хэмээсэн аж. Тус олимпийн наадамд тэр алтан медаль хүртсэн билээ.