1 мин

23 настай Дариа Билодид Европын хошой аварга боллоо

У.Чинзориг 2024.04.26

Жүдо бөхийн Европын АШТ 4-р сарын 25-27-ний өдрүүдээр Хорватын Загреб хотноо явагдаж байна.

Украинаас цэл залуугаараа дэлхийд гялалзсан олимпын хүрэл медальт, дэлхийн хошой аварга Дариа Билодид Европын АШТ-ий 57 кг-ын жинд нэвтхэн барилдаж түрүүлэв.

Тэрбээр эхний тойрогтоо гоц мөргөж, залуучуудын Европын АШТ-ий алт, мөнгөн медальт Фихла Салонен, Азербайжаны Ачеля Топрак, 2022 оны Европын аварга Нелсон Леви Тимна нарыг ялж хэсгээ тэргүүлсэн юм. Улмаар хагас шигшээд залуучуудын дэлхийн аварга, өсвөр үе, залуучууд, 23 хүртэлх насны ангиллаарх Европын аварга Этери Липартелианиг, финалд 2021 оны Европын АШТ-ий үзүүр бөх Каяа Кайзер нарыг ялж түрүүлэв.

Ийнхүү, Билодид өнгөрсөн оны наймдугаар сараас хойш зодоглосон дөрвөн тэмцээнээсээ нэг алт, гурван хүрэл медаль хүртээд байна.

Тэрбээр 2017 онд анхлан Европын аваргад түрүүлж байсан бол долоон жилийн дараа Европын хошой аварга боллоо.

Билодидын зодоглох дараагийн тэмцээн тавдугаар сарын 19-23-ний өдрүүдээр явагдах жүдо бөхийн ДАШТ байх юм.