Зуны олимпын XXXIII наадмын уралдаан тэмцээний эргэн тойронд болж буй үйл явдлуудыг базваас:
*****
Сонгомол бөхийн (грек-ромын бөх гэж ч ярьдаг) 130 кг-ийн жинд алтан медалийн төлөө Кубын алдарт бөх Михаин Лопес Чилийн Ясмани Фернандесийг 6:0 оноогоор ялж, Олимпын тав дахь алтан медалиа хүртэв. Аугаа Александр Карелин, Алексей Медведь аль аль нь ийм амжилтад хүрч байсангүй. Ер эрэгтэйчүүдээс олимпын дөрвөн алттай хүн ч Лопесоос өөр нэг ч байхгүй байсан юм.
Удахгүй 42 нас хүрэх гэж буй Лопес алтан медалийн төлөө барилдаанд ялсан даруйдаа бөхийн дэвжээн дээрээ "борцовк"-оо үлдээж, зодог тайлж буйгаа зарлалаа.
Михаин Лопес олимпын түүхэнд хувийн төрлөөр таван олимп дараалан алтан медаль хүртсэн анхны тамирчин боллоо.
*****
Эмэгтэйчүүдийн хөлбөмбөгийн хагас шигшээд Олимпын дөрвөн удаагийн аварга АНУ-ын баг Германыг нэмэлт цагт 1:0-ээр хожсон бол Бразилийн бүсгүйчүүд дэлхийн аварга Испанийн шигшээг 4:2 -оор ялж, финалд үлдлээ.
Ийнхүү "Парис-2024" олимпын алтан медалийн төлөө олимпын 4 алт (1996,2004,2008,2012), 1 мөнгө (2000), 1 хүрэл (2020) медальт АНУ, олимпын хошой мөнгөн ( 2004,2008) медальт Бразилийн багууд халз тулах нь.
Дэлхийн эмэгтэй хөлбөмбөгийн "Хатан хаан", Бразилийн домогт хөлбөмбөгч Марта зургаа дахь олимпдоо оролцож буй бөгөөд Бразилийн шигшээд аварга цол авч өгөх сүүлчийн боломж доо.
*****
Багийн спортын төрлүүд хамгийн сонирхолтой үедээ ирээд байгаа.
Эмэгтэй гандболын хагас шигшээд Норвеги-Дани, Швед-Франц үлдээд байгаа бол эрэгтэйчүүдийн шөвгийн наймын тоглолтууд өнөөдөр Испани-Египет, Герман-Франц, Дани-Швед, Норвеги-Словений хооронд болно.
*****
Волейболын эрэгтэйчүүдийн хагас шигшээд Польш-АНУ, Итали-Франц үлдлээ. Шөвгийн наймд Итали Японд, Франц Германд аль аль нь 0:2 –оор (эхний хоёр сетэд хожигдсон) хожигдож яваад тоглолтыг эргүүлж 2:2 болгон, улмаар тай-брэйкээр ялалт авсан.
Эмэгтэй хагас шигшээд Бразил-АНУ, Турк-Итали шалгараад байгаа.
*****
Талбайн хоккейн (манайхан зүлгэн дээрх хоккей хэмээн нэрлэж заншсан) эрэгтэйчүүдийн тэмцээнд хүрэл медалийн төлөө Энэтхэг-Испани, алтан медалийн төлөө Герман-Холланд наймдугаар сарын найманд тоглоно.
Эмэгтэйчүүдийн тэмцээний хагас шигшээд (8.07) Холланд-Аргентин, Бельги-БНХАУ-ын махир цохиуртай хоккейчид хүч үзнэ.
Ц.Энхтүвшин Таван цагариг сонин
