Мэргэжлийн сүмо бөхийн Нэгдүгээр сарын тэмцээн Токио хотод үргэлжлэн явагдаж байна. Тэмцээний 12 дахь өдрийн байдлаар жюүрёо зиндаанд хоёр украин бөх тэргүүлж байгаа нь түүхэнд анд удаагаа тохиосон үйл явдал боллоо. Мөн өнөөдөр анх удаагаа Украины хоёр сүмоч учраа таарч, өрсөлдлөө.
Жюүрёогийн баруун жигүүрийн 4 дэх бөх Шиши буюу Сергей Соколовский жюүрёогийн барууны 5-д бичигдсэн Аонишики хэмээх Данило Явхусишин нар халз барилдлаа. Шиши цүкиотоши мэхээр ялж, жюүрёог тэргүүлсэн хэвээр үлдлээ.
Мэргэжлийн сүмо бөхийн 68 дахь ёкозүна Асашёорюү твиттер хуудсан дээрээ Шишид зөвлөгөө өгсөн байна. Тэрээр “Шиши дандаа бярдаж болохгүй. Чиний барилдаан хэт аюул, эрсдэлтэй байна шүү. Улам доош сууж золгоод, мавашины барьц ав. Энэ сайхан бие байхад дараа нь ёрикири мэхээр ч юмуу ялж болно. Украин хичээгээрэй” гэж бичсэн байлаа.
Асашёорюүгийн бичвэр дор Шишигийн “Иказүчи” дэвжээнээс “Их баярлалаа. Шишид дамжуулна” гэж сэтгэгдэл үлдээсэн байв.
Украинаас төрсөн анхны сэкитори Шиши хэмээх Сергей Соколовский - Дайны хөлд сүйдсэн Мелитополь хотын уугуул тэрээр 27 настай. Зургаан настайгаасаа чөлөөт бөх, 15 настайгаасаа жүдо бөхөөр хичээллэж, 2020 онд сүмод ирсэн залуу. Сонирхогчдын сүмо бөхийн 2017 оны Европын аварга. ДАШТ-ий нэг мөнгө, дөрвөн хүрэл медальтай. Европоос төрсөн озэки Барүтотой түүнийг харьцуулан “Жижиг Барүто” гэж нэрлэдэг.
